दुसऱ्या लग्नाआधी अभिनेत्रीने मागितली सावत्र मुलीची परवानगी; आजही तिला म्हणत नाही ‘आई’
बॉलिवूड इंडस्ट्रीतील या प्रसिद्ध अभिनेत्रीने पाच वर्षांपूर्वी दुसरं लग्न केलं. या दुसऱ्या लग्नापूर्वी तिने सावत्र मुलीची परवानगी मागितली होती. मात्र लग्नानंतरही सावत्र मुलगी तिला 'आई' म्हणत नसल्याचा खुलासा अभिनेत्रीने केला आहे.
अभिनेत्री दिया मिर्झाने घटस्फोटानंतर 2021 मध्ये बिझनेसमन वैभव रेखीशी दुसरं लग्न केलं. 15 फेब्रुवारी 2021 रोजी या दोघांनी मोजक्या पाहुण्यांच्या उपस्थितीत लग्नगाठ बांधली होती. दिया मिर्झाप्रमाणेच वैभव रेखीचंही हे दुसरं लग्न होतं. पहिल्या लग्नापासून त्याला एक मुलगी आहे. तर दिया आणि वैभव यांना एक मुलगा आहे. लग्नानंतर दियाने वैभवच्या मुलीचाही कुटुंबात मनापासून स्वीकार केला. आता लग्नाच्या पाच वर्षांनंतर दिया तिच्या या दुसऱ्या लग्नाविषयी मोकळेपणे व्यक्त झाली आहे.
वैभवला पहिल्या पत्नीपासून एक मुलगी असून तिचं नाव समायरा असं आहे. वडिलांच्या दुसऱ्या लग्नानंतर समायरा तिच्या सावत्र आईसोबत म्हणजेच दियासोबतच राहतेय. दियाने या मुलाखतीत खुलासा केला की, जर समायराने परवानगी दिली नसती तर पाच वर्षांपूर्वी ती वैभवशी दुसरं लग्न करू शकली नसती. समायराने परवानगी दिल्यानंतरच दोघांनी लग्नाचा निर्णय घेतला होता.
‘टाइम्स एंटरटेन्मेंट’ला दिलेल्या मुलाखतीत दिया म्हणाली, “वैभवने केलेली सर्वांत पहिली आणि महत्त्वाची गोष्ट म्हणजे त्याने नात्याच्या अगदी सुरुवातीपासूनच समायराला समाविष्ट करून घेतलं. वैभवने समायराला हे ठरवण्याची संधी दिली की तिला हे नातं हवं आहे का, तिला अशा प्रकारचं आयुष्य हवं आहे का आणि तिला आम्हाला एक कुटुंब म्हणून पहायचं आहे का? ते खूप महत्त्वाचं होतं, असं मला वाटतं. कारण जर समायराने त्या सुरुवातीच्या काळात मला नकार दिला असता किंवा आमच्यात ताळमेळ नाही असं मला वाटलं असतं, तर आम्ही हे नातं आता जसं पुढे नेतोय, तसं कधीच शक्य झालं नसतं. आमच्या नात्याला समायराची संमती मिळणं हेच सर्वांत महत्त्वाचं होतं.”
अभिनेत्रीच्या लग्नाचे फोटो-
View this post on Instagram
‘न्यूज 18’ला दिलेल्या एका मुलाखतीत दियाने असाही खुलासा केला होता की, समायरा तिला अजूनही ‘माँ’ किंवा ‘मम्मा’ म्हणत नाही. मात्र याबाबत तिलाही तशी कोणतीही अपेक्षा नाही. “तिने मला कधीच माँ म्हटलं नाही. तिने मला माँ, मम्मा किंवा मॉम म्हणावं अशी माझी अपेक्षा नाही. तिची स्वत:ची आई आहे, जिला ती मम्मा किंवा मॉम म्हणते. ती मला माझ्या नावानेच हाक मारते.”
दिया मिर्झा आणि वैभव रेखी यांना एक मुलगा असून त्याचं नाव आझाद असं आहे. याआधी दियाने 2014 मध्ये निर्माता साहिल संघाशी लग्न केलं होतं. मात्र 2019 मध्ये या दोघांचा घटस्फोट झाला.
