मला ते सहन होणार नाही..; सून गौहरच्या कामाविषयी इस्माइल दरबारचं वक्तव्य चर्चेत

बॉलिवूड इंडस्ट्रीतील प्रसिद्ध संगीतकार इस्माइल दरबार यांनी नुकत्याच दिलेल्या एका मुलाखतीत सून आणि अभिनेत्री गौहर खानच्या काम करण्याबाबत थेट आक्षेप व्यक्त केला. ‘बिग बॉस’ फेम गौहरने इस्माइल यांचा मुलगा झैद दरबारशी लग्न केलंय. या दोघांना दोन मुलं आहेत. विक्की लालवानीला दिलेल्या मुलाखतीत इस्माइल यांनी स्पष्ट केलं की ते जुन्या विचारांचे आहेत. गौहर लग्नानंतर आणि आई झाल्यानंतरही इंडस्ट्रीत काम करत असल्याचं त्यांना मान्य नाही. इतकंच नव्हे तर सुनेचं काम मी पाहतच नाही, असंही त्यांनी सांगितलं.

या मुलाखतीत ते म्हणाले, “गौहरबद्दल मला फक्त इतकंच माहीत आहे की झैदसोबत तिचं खूप चांगलं नातं आहे. पहिल्या मुलाचं संगोपन त्या दोघांनी मिळून खूप चांगल्या पद्धतीने केलं.” यावेळी त्यांना विचारण्यात आलं की, त्यांनी गौहरचे चित्रपट पाहिलेत का? त्यावर उत्तर देताना त्यांनी पुढे सांगितलं, “माझ्या कुटुंबाची विचारसरणी थोडी जुनी आहे. मी अशा वातावरणात मोठा झालो आणि राहिलोय. आता गौहर आमच्या घराची अब्रू आहे तर मी तिला थेट बोलू शकत नाही की, तू काम बंद कर. तो माझा अधिकार नाही. तो तिच्या पतीचा म्हणजेच झैदचा अधिका आहे.”

View this post on Instagram

A post shared by Gauahar Khan (@gauaharkhan)

“म्हणूनच मी कधी तिचं काम पाहत नाही. कारण जर पाहिलं तर माझ्याने ते सहन होणार नाही. माझी पत्नी आयेशाने मुलांच्या जन्मानंतर काम करणं बंद केलं होतं. त्यावेळी ती शोच्या माध्यमातून पाच लाख रुपये प्रति महिना कमवत होती. तिला मुख्य अभिनेत्रीचीही ऑफर मिळाली होती. तिने कधीच म्हटलं नव्हतं की तिला गाणं गायचं आहे किंवा परफॉर्म करायचं आहे. जेव्हा मला पैशांची गरज होती, तेव्हासुद्धा तिने कमावण्याचा हट्ट धरला नव्हता”, अशा शब्दांत ते व्यक्त झाले.

गौहर खानने डिसेंबर 2020 मध्य झैद दरबारशी निकाह केला होता. दोन वर्षांपूर्वी मे 2023 मध्ये तिने मुलाला जन्म दिला. नुकतीच ती दुसऱ्यांदा आई बनली. सप्टेंबर 2025 मध्ये तिने पुन्हा मुलाला जन्म दिला.