फक्त या एका गोष्टीसाठी काजोलने मोडला ‘नो किसिंग’चा नियम; म्हणाली “ते खूप अन्कम्फर्टेबल..”
'द ट्रायल' या वेब सीरिजमध्ये काजोलचा किसिंग सीन चांगलाच चर्चेत आला होता. कारण पडद्यावर कधीच किसिंग सीन करायचा नाही, असा तिचा नियम होता. मात्र या सीरिजसाठी तिने हा नियम मोडला होता. त्यामागचं कारण आता तिने सांगितलं आहे.
अभिनेत्री काजोल जवळपास गेल्या तीन दशकांपासून हिंदी चित्रपटसृष्टीत काम करतेय. तिने आतापर्यंत ‘दिलवाले दुल्हनियाँ ले जाएंगे’, ‘कभी खुशी कभी गम’, ‘कुछ कुछ होता है’ यांसारख्या सुपरहिट चित्रपटांमध्ये दमदार भूमिका साकारल्या आहेत. 2023 मध्ये काजोलने ओटीटी प्लॅटफॉर्मवर पदार्पण केलं होतं. ‘द ट्रायल- प्यार, कानून, धोखा’ या वेब सीरिजमध्ये तिने काम केलं होतं. ओटीटीवर पदार्पण करताच काजोलने तिची अनेक वर्षांपासूनची ‘नो किसिंग पॉलिसी’ मोडली होती. या सीरिजमधील अभिनेता जिशू सेनगुप्तासोबत तिचा किसिंग सीन चांगलाच चर्चेत होता. पडद्यावर कधीच किसिंग सीन करायचा नाही, हा काजोलचा नियम होता. मात्र या सीरिजसाठी तिने हा नियम का मोडला, याचं उत्तर खुद्द काजोलने नुकत्याच दिलेल्या एका मुलाखतीत दिलं आहे.
लिली सिंहच्या पॉडकास्टमध्ये बोलताना काजोल म्हणाली, “खरं सांगायचं तर, हा त्या सिझनचा विषय होता. त्या भूमिकेसोबत आणि ती नेमकी कशी आहे, हे पडद्यावर दाखवण्याबाबत बरंच काही करता येण्यासारखं होतं. तो फक्त साधा किस नव्हता, ती काय विचार करत होती आणि तिला काय करायचं होतं, तिच्यासाठी काय घडलं नव्हतं.. याबद्दल ते सर्वकाही होतं. तिचा कशावर विश्वास होता, कशावर श्रद्धा होती, कशावर नव्हती यासंदर्भात ते होतं. तो किसिंग सीन त्या सीरिजच्या संपूर्ण पटकथेचा महत्त्वाचा भाग होता. त्यामुळे त्या भूमिकेतून मी तो भाग काढून टाकू शकत नव्हेत. ती त्या सीनची, त्या कथेची, त्या सीरिजची गरज होती.”
जेव्हा लिलीने तिला विचारलं की काजोलसुद्धा एक व्यक्ती म्हणून बदलली का, तर त्यावर उत्तर देताना ती पुढे म्हणाली, “मला असं वाटतं की मी अन्कम्फर्टेबल होते. सेटवर उभं राहेपर्यंत माझ्यासाठी ते प्रचंड अन्कम्फर्टेबल होतं. मला थिअरीमध्ये ते आवडलं होतं आणि मी खरंच तो सीन करणार का याबद्दल मलाच खात्री नव्हती. कट, हे मी करणार नाही.. असं मी त्यांना बोलेन का, हेसुद्धा मला माहीत नव्हतं. पण तो फक्त एक सीन होता. प्रोफेशनल दृष्टीकोनातून तुम्हाला काही निर्णय घ्यावे लागतात आणि मला त्यावेळी असं वाटलं की मी आता तो निर्णय घेऊ शकते.”
या सीरिजमध्ये काजोलने नोयोनिका सेनगुप्ताची भूमिका साकारली होती, जी एक गृहिणी असते, परंतु पतीच्या स्कँडलनंतर ती कायदेक्षेत्रात पुन्हा परतते. या कोर्टरुम ड्रामाचं दिग्दर्शन सुपर्ण वर्माने केलं होतं.
