मयूरी देशमुखने रोमँटिक सीन शूट करताना अभिनेत्याच्या लगावली कानशि‍लात, नेमकं काय झालं?

छोट्या पडद्यावर अनेक मालिका येतात आणि जातात, पण काही मालिका प्रेक्षकांच्या मनात कायमच्या घर करतात. अशीच एक मालिका म्हणजे ‘खुलता कळी खुलेना’. 2016 मध्ये झी मराठीवर प्रसारित झालेली ही मालिका अनोख्या कथानकामुळे आणि ओमप्रकाश शिंदे व मयूरी देशमुख यांच्या जबरदस्त केमिस्ट्रीमुळे प्रेक्षकांच्या खास पसंतीस उतरली. आजही या मालिकेचे चाहते यूट्यूब आणि नेटफ्लिक्सवर त्यांचे आवडते एपिसोड्स शोधताना दिसतात. या मालिकेच्या शूटिंगदरम्यान घडलेला एक मजेदार किस्सा नुकत्याच एका मुलाखतीत समोर आला आहे.

मयूरीने का मारली ओमप्रकाशला कानशिलात?

‘राजश्री मराठी’च्या एका कार्यक्रमात ओमप्रकाश आणि मयूरी यांनी त्यांच्या मालिकेच्या सेटवरील एक मजेशीर अनुभव शेअर केला. ओमप्रकाशने सांगितलं, “शूटिंगदरम्यान एका डान्स रिहर्सलच्या वेळी मी आणि मयूरी जोडीने नृत्य करत होतो. स्टेप्स करताना मी तिच्या मागे होतो आणि ती माझ्या पुढे. चुकून माझ्या गालाचा तिच्या गालाला स्पर्श झाला. मयूरीला वाटलं की मी हे मुद्दाम केलं आणि तिनं एकदम माझ्या कानाखाली लागवली!”

वाचा: बाबा वेंगाचे नवे भाकीत! ‘या’ चार राशींचे नशीब पलटणार, होणार गडगंज श्रीमंत

यावर मयूरी हसत हसत म्हणाली, “मी नवीन लोकांशी लगेच मोकळी होत नाही. मला नमस्कार करणं जास्त आवडतं, मिठी मारणं तर खूपच दूरची गोष्ट. त्यामुळे मला क्षणभर वाटलं की ओमप्रकाशने मुद्दाम असं केलं. पण नंतर मला समजलं की ही चूक होती.”

मैत्रीची सुरुवात आणि अविस्मरणीय जोडी

या घटनेमुळे सुरुवातीला दोघांमध्ये थोडा अवघडलेपणा निर्माण झाला. पण हळूहळू त्यांची मैत्री दृढ झाली आणि त्यांनी छोट्या पडद्यावर एक अप्रतिम जोडी साकारली. ओमप्रकाशने ‘काळी माती’ ते ‘अथांग’सारख्या चित्रपटांमध्ये आपल्या अभिनयाची छाप पाडली आहे. तर मयूरीने ‘मन धागा धागा जोडते नवा’सारख्या मालिकांमधून प्रेक्षकांची मने जिंकली आहेत.

‘खुलता कळी खुलेना’ ही मालिका आणि त्यातील ओमप्रकाश-मयूरीची जोडी आजही चाहत्यांच्या मनात आहे. त्यांच्या सेटवरील अशा मजेदार आठवणी चाहत्यांना या मालिकेची आणि त्यांच्या जोडीची आठवण करून देतात.