‘लय आवडतेस तू मला’मध्ये पहायला मिळणार महाराष्ट्राच्या मातीतील अस्सल झन्नाट- रांगडी प्रेमकथा
मालिकेत सानिकाचे वडील साहेबराव पाटील यांच्या भूमिकेत संजय खापरे आहेत. साहेबराव पाटील हे साखरगावच्या साखरकारखान्याचे मालक आहेत. तर सरकारचे वडील हे साखरकारखान्यातील कामगारांचे युनियन लिडर आहेत. अभिनेते किरण माने या मालिकेत सरकारच्या वडिलांची भूमिका साकारत आहेत.
‘कलर्स मराठी’ वाहिनीवर ‘लय आवडतेस तू मला’ ही नवी मालिका लवकरच प्रेक्षकांच्या भेटीला येणार आहे. प्रेक्षकांच्या काळजाला हात घालण्यात ही मालिका यशस्वी ठरेल का हे पाहणं औत्सुक्याचं ठरणार आहे. एका सरळ रेषेत चालणाऱ्या आयुष्याचं, समाजाचं, हाडा-मासाच्या लोकांचं, त्यांच्या प्रेमाचं सत्य मांडणारी ही मालिका आहे. सानिका आणि सरकार या दोन पात्रांसह त्यांच्या गावांभोवती फिरणारी ही मालिका आहे. काही दिवसांपूर्वीच मालिकेची पहिली झलक समोर आली होती. प्रेक्षकांना आता या मालिकेची उत्सुकता आहे. सानिका मोजर आणि तन्मय जक्का हे कलाकार या मालिकेत मुख्य भूमिकेत झळकणार आहेत. ही मालिका येत्या 14 ऑक्टोबरपासून रात्री 9.30 वाजता कलर्स मराठी वाहिनीवर प्रेक्षकांच्या भेटीला येणार आहे.
सानिका आणि सरकार या दोन एकमेकांवर प्रेम करणाऱ्या पात्रांभोवती फिरणारी ‘#लय आवडतेस तू मला!’ या मालिकेचं कथानक फिरतं. दोन प्रेम करणाऱ्यांच्या कुटुंबांना त्यांचं प्रेम मान्य नाही अशा अनेक प्रेमकथा आजवर आपण पाहिल्या आहेत. पण साखरगावची अल्लड सानिका आणि कळशी गावचा रांगडा सरकार यांच्या प्रेमकथेला तर त्या दोघांच्या गावांचाच विरोध आहे. कारण या गावांमध्ये पिढीजात वैर आहे. जे एकमेकांचा जीव घ्यायलाही मागेपुढे बघत नाही, अशा वातावरणात सानिका आणि सरकारचं अल्लड प्रेम बहरणार का, हे मालिकेत पहायला मिळेल. शत्रुत्वाच्या आगीत फुलणाऱ्या ही आगळीवेगळी प्रेमकथा उलगडणारी गोष्ट म्हणजे ‘#लय आवडतेस तू मला’ ही मालिका.
छोट्या पडद्यावरील प्रेम कथेची चौकट मोडण्याचा धाडसी प्रयत्न ‘#लय आवडतेस तू मला’ या मालिकेत करण्यात आला आहे. आता छोट्या पडद्यावर प्रेम आणि शत्रुत्वाचा रंजक खेळ रंगणार आहे. गावाकडच्या गुलाबी प्रेमाची थरारक प्रेमकथा प्रेक्षकांना पाहायला मिळेल. तरुण वर्गासह सर्वांनाच आकर्षित करणारी ही मालिका आहे. थरार, नाट्य, रोमान्स अन् बरंच काही प्रेक्षकांना या मालिकेत पाहायला मिळेल.
View this post on Instagram
‘#लय आवडतेस तू मला’ मालिकेतील सानिका खूपच निरागस, भावूक, जिद्दी आणि प्रेमळ आहे. तर सरकार तिच्या पूर्णपणे विरुद्ध आहे. तो गावचा छावा आहे. अत्यंत रावडी असं त्याचं व्यक्तिमत्त्व आहे. एका वेगळ्याच संघर्षातून फुलणारं प्रेम प्रेक्षकांना या नव्या मालिकेत पाहायला मिळणार आहे.
‘#लय आवडतेस तू मला’ मालिकेबद्दल बोलताना कलर्स मराठीचे, (वायकॉम18) प्रोग्रॅमिंग हेड केदार शिंदे म्हणाले, “कलर्स मराठी वाहिनीवर सध्या वेगवेगळे प्रयोग होत आहेत. ‘#लय आवडतेस तू मला’ ही मालिकादेखील याचाच एक भाग आहे. प्रेक्षकांनी आजवर अनेक प्रेम कथा पाहिल्या असतील. पण ही झन्नाट लव्हस्टोरी मात्र यासगळ्यापेक्षा वेगळी आहे. प्रेक्षकांना खिळवून ठेवणारी ही मालिका आहे. फ्रेश जोडी, रांगडी कथा, गावरान बाज अशा मालिकेतील अनेक गोष्टींची प्रेक्षकांना नक्कीच भुरळ पडेल”.
