फक्त दिखावा करू नका..; राजपाल यादवच्या मदतीवरून गायकाने कोणाला फटकारलं?

चेक बाऊन्स प्रकरणात तिहार तुरुंगात शिक्षा भोगणाऱ्या अभिनेता राजपाल यादवच्या मदतीसाठी अनेक सेलिब्रिटी पुढे सरसावले आहेत. सलमान खान, अक्षय कुमार, सोनू सूद, इंजरजीत सिंह, गुरमीत चौधरी यांसारख्या सेलिब्रिटींनी राजपालला मदत जाहीर केली आहे. यामध्ये आता प्रसिद्ध गायक मिका सिंहचाही समावेश झाला आहे. मिकाने राजपालला 11 लाख रुपयांची मदत केली आहे. राजपालला एकूण 9 कोटी रुपयांचं कर्ज फेडायचं आहे. मिकाने त्याला आर्थिक मदत केली असून व्हिडीओ पोस्ट करत काही सेलिब्रिटींनाही फटकारलं आहे. सोशल मीडियावर मदत जाहीर करून फक्त दिखावा करू नका, असं त्याने म्हटलंय.

मिका सिंह म्हणाला, “राजपाल यादवजी, या कठीण काळात मी तुमच्या बाजूने खंबीरपणे उभा आहे. मदत म्हणून मी माझ्याकडून 11 लाख रुपयांच योगदान देतोय. तुम्ही लाखो लोकांच्या चेहऱ्यावर हास्य आणलंय आणि आज तुमच्यासोबत उभं राहण्याची आमची वेळ आली आहे. मी फिल्म इंडस्ट्रीतील सर्व लोकांना मी आवाहन करतो की, त्यांनी पुढे यावं आणि आपल्या क्षमतेनुसार मदत करावी. आपण एक कुटुंब आहोत आणि नेहमीच आपल्या लोकांसाठी आपण एकत्र यावं. राजपालची परिस्थिती आपल्या सर्वांना माहीत आहे आणि आता त्याला पैशांची खूप गरज आहे. मी असं म्हणत नाही की तुम्ही 5 कोटी रुपये द्या. पण 20 लोकांनी जरी 50-50 लाख रुपये जाहीर केले, 25 लाख रुपये जाहीर केले, 11 लाख रुपये जाहीर केले तरी राजपालची खूप मोठी मदत होऊ शकते. त्यामुळे फक्त पोस्ट करू नका, दिखावा करू नका.”

View this post on Instagram

A post shared by Viral Bhayani (@viralbhayani)

नेमकं काय आहे प्रकरण?

2010 मध्ये राजपाल यादवने एम. एस. मुरली प्रोजेक्ट्स प्रायव्हेट लिमिटेडकडून त्याच्या एका चित्रपटासाठी पाच कोटी रुपयांचं कर्ज घेतलं होतं. ‘अता पता लापता’ या चित्रपटाचं दिग्दर्शन राजपाल करत होता. परंतु हा चित्रपट बॉक्स ऑफिसवर फ्लॉप झाला आणि त्यामुळे त्याला मोठा आर्थिक तोटा सहन करावा लागला. व्याज, दंड, विलंबित देयकं यांमुळे थकबाकीची रक्कम जवळपास 9 कोटी रुपयांपर्यंत वाढली. कर्ज चुकवण्यासाठी त्याने कर्जदात्याला अनेक चेक्स दिले होते. परंतु हे चेक्स बाऊन्स झाले. त्यामुळे नेगोशिएबल इन्स्ट्रुमेंट्स कायद्यांतर्गत त्याच्याविरोधात फौजदारी कारवाई सुरू झाली.