“.. तर थिएटरची एकही काच शिल्लक राहणार नाही”; मनसेनं भरला दम
'धर्मरक्षक महावीर संभाजी महाराज' या चित्रपटाला एकही शो न लावल्याने मनसेनं उल्हासनगरमधील एका थिएटरच्या व्यवस्थापकाला चांगलाच दम भरला आहे. थिएटरची एकही काच शिल्लक राहणार नाही, असा धमकीवजा इशाराच मनसेनं दिला आहे.
‘धर्मरक्षक महावीर संभाजी महाराज’ या चित्रपटाचा शो लावला नाही, तर चित्रपटगृहाची एकही काच शिल्लक राहणार नाही, असा सज्जड दम मनसेनं उल्हासनगरच्या मिराज अशोक अनिल चित्रपटगृहाला दिला आहे. या चित्रपटगृहाने ‘धर्मरक्षक महावीर संभाजी महाराज’ चित्रपटाचा एकही शो न लावल्यामुळे मनसेनं चित्रपटगृहाबाहेर निदर्शनं करत व्यवस्थापकांना हा दम दिला आहे. उल्हासनगरच्या मिराज अशोक अनिल चित्रपटगृहात नुकत्याच रिलीज झालेल्या ‘पुष्पा 2’ चित्रपटाचे दिवसाला 15 शो लावण्यात आले आहेत. तर ‘द साबरमती फाइल्स’ या चित्रपटाचा एक शो लावण्यात आला आहे. ‘धर्मरक्षक महावीर छत्रपती संभाजी महाराज’ या चित्रपटाचा मात्र एकही शो या चित्रपटगृहात लावण्यात आलेला नाही. याबाबत तक्रारी आल्यानंतर मनसे जिल्हाध्यक्ष बंडू देशमुख आणि शहराध्यक्ष संजय घुगे यांच्या नेतृत्वाखाली मनसे पदाधिकाऱ्यांनी आणि कार्यकर्त्यांनी थेट या चित्रपटगृहावर धडक देत निदर्शनं केली.
‘धर्मरक्षक महावीर छत्रपती संभाजी महाराज’ या चित्रपटाचा शो जर लागला नाही, तर चित्रपटगृहाची एकही काच शिल्लक राहणार नाही आणि चित्रपटगृहात एकही शो होऊ देणार नाही, असा सज्जड दम यावेळी मनसेनं चित्रपटगृहाच्या व्यवस्थापकांना दिला. यानंतर येत्या एक ते दोन दिवसात या चित्रपटाचा शो लावण्याचं आश्वासन व्यवस्थापकांनी मनसे पदाधिकाऱ्यांना दिलं आहे.
‘धर्मरक्षक महावीर छत्रपती संभाजी महाराज’ हा भव्य चित्रपट हिंदी आणि मराठी या दोन्ही भाषांमध्ये प्रदर्शित झाला असून छत्रपती संभाजी महाराजांच्या अद्वितीय शौर्याचा आणि त्यागाचा सन्मान या चित्रपटाद्वारे करण्यात आला आहे. या चित्रपटात ठाकूर अनुप सिंग, अमृता खानविलकर, किशोरी शहाणे, भार्गवी चिरमुले, मल्हार मोहिते-पाटील, संजय खापरे, पल्लवी वैद्य, कमलेश सावंत, विनीत शर्मा, प्रदीप रावत, प्रदीप कब्रा, राज जुत्शी यांच्या भूमिका आहेत. चित्रपटाचे दिग्दर्शक तुषार शेलार म्हणतात, “संभाजी महाराजांचं जीवन म्हणजे प्रेरणादायी पराक्रमाची गाथा. ट्रेलरमध्ये आम्ही त्यांच्या संघर्षाच्या आणि वीरतेच्या काही महत्त्वाच्या क्षणांना उभं करण्याचा प्रयत्न केला आहे. या चित्रपटाच्या माध्यमातून प्रेक्षकांना त्यांच्या जीवनातील प्रत्येक टप्प्याचा अनुभव घेता येईल.” धर्म आणि स्वराज्यासाठी समर्पित असलेल्या छत्रपती संभाजी महाराजांच्या अद्वितीय कार्याची गाथा या चित्रपटात पाहायला मिळत आहे.
