Mukesh Khanna: “जर एखादी मुलगी तुमच्याकडे सेक्सची मागणी करत असेल तर..”; मुकेश खन्ना यांच्या विधानावर भडकले नेटकरी
नुकताच त्यांचा एक व्हिडिओ सोशल मीडियावर व्हायरल (Viral Video) होत आहे, ज्यामध्ये ते अशा काही गोष्टी सांगत आहेत, जे ऐकल्यानंतर यूजर्सनी संताप व्यक्त केला आहे.
अभिनेता मुकेश खन्ना (Mukesh Khanna) सध्या सोशल मीडियावर खूप सक्रिय आहेत. सोशल मीडियावर ते अनेकदा कोणत्या ना कोणत्या विषयावर आपली मतं मांडत असतात. नुकताच त्यांचा एक व्हिडिओ सोशल मीडियावर व्हायरल (Viral Video) होत आहे, ज्यामध्ये ते अशा काही गोष्टी सांगत आहेत, जे ऐकल्यानंतर यूजर्सनी संताप व्यक्त केला आहे. या व्हिडिओमध्ये मुकेश खन्ना म्हणत आहेत की, “जी मुलगी एका मुलाला सेक्ससाठी विचारते, ती मुलगी नसून ती सेक्सचा व्यवसाय करत असते. लोकांनी अशा गोष्टींमध्ये पडू नये.” मुलींबद्दलच्या त्यांच्या याच वक्तव्यावर नेटकरी भडकले आहेत. त्यांच्या या व्हिडीओवर विविध प्रतिक्रिया (Trolling) येत आहेत.
नेमकं काय म्हणाले मुकेश खन्ना?
शक्तीमान या मालिकेतून घराघरात पोहोचलेले अभिनेते मुकेश खन्ना त्यांच्या या व्हिडीओमध्ये म्हणाले, “जर एखाद्या मुलीने एखाद्या मुलाला सांगितलं की मला तुझ्याशी शारीरिक संबंध ठेवायचे आहेत, तर तो तिचा व्यवसाय आहे. कारण कोणत्याही सुसंस्कृत समाजातील मुलगी असं म्हणणार नाही. असं म्हणणारी मुलगी निर्लज्ज असते, त्यामुळे तिच्या पापात सहभागी होऊ नका.” मुकेश यांनी त्यांच्या भीष्म इंटरनॅशनल या युट्यूब चॅनलवर हा व्हिडीओ पोस्ट केला आहे. ‘क्या आपको भी ऐसी लडकीयाँ लुभाती है?’ असं या व्हिडीओचं शीर्षक त्यांनी दिलंय.
नेटकऱ्यांचा संताप
मुकेश खन्ना यांच्या या व्हिडिओवर अनेकजण कमेंट्स करत त्यांना फटकारत आहेत. एका युजरने म्हटलं, ‘ठीक आहे, आता सिव्हिल सोसायटीचा व्हिडीओ बनवा.’ तर दुसर्याने लिहिलं, ‘जेव्हा शक्ती आणि मान या दोन्ही गोष्टी तुमच्यातून निघून जातात.’ आणखी एका युजरने शक्तीमानमधलाच संवाद उपरोधिकरित्या लिहिला. ‘अंधेरा कायम रहे’ असं त्या नेटकऱ्याने लिहिलं.
