Naal 2 : ‘चैतू’ची आई आता तरी त्याच्याशी बोलणार का? ‘नाळ 2’चा दुसरा टीझर पाहिलात का?

मुंबई | 21 ऑक्टोबर 2023 : ‘नाळ’च्या या चित्रपटाच्या पहिल्या भागात चैतूची आई त्याच्याशी न बोलताच निघून गेली होती. आता चैतू त्याच्या आईला पश्चिम महाराष्ट्रात भेटायला जाणार आहे. मात्र आता इतकी वर्षं झाल्यानंतर त्यांच्यातील हा दुरावा निवळेल का? चैतू त्याच्या आईकडे येईल का? त्यांच्यातील हा अबोला संपेल का? असे अनेक प्रश्न प्रेक्षकांना पडले असतील. परंतु या सगळ्या प्रश्नांची उत्तरं प्रेक्षकांना येत्या 10 नोव्हेंबर रोजी चित्रपटगृहात मिळणार आहेत. नुकताच या चित्रपटाचा दुसरा टीझर प्रेक्षकांच्या भेटीला आला आहे. या टीझरमध्ये चैतू त्याच्या आईबरोबर दिसत आहे. मात्र त्यांच्या नात्याची नाळ जुळली आहे का, हे अद्यापही अनुत्तरित आहे. याचा उलगडा आता लवकरच होणार आहे.

‘नाळ भाग 2’च्या पहिल्या टीझरलाही प्रेक्षकांनी भरभरून प्रतिसाद दिला. नुकतंच प्रदर्शित झालेलं ‘भिंगोरी’ गाणंही सध्या ट्रेंडिंगमध्ये आहे. ‘आई मला खेलायला जायचंय’ या गाण्याप्रमाणेच ‘भिंगोरी’ या गाण्याचे व्ह्यूजही दिवसेंदिवस वाढत आहेत. झी स्टुडिओज आणि नागराज मंजुळे निर्मित ‘नाळ भाग 2’चं  दिग्दर्शन सुधाकर रेड्डी यंक्कट्टी यांनी केलं आहे. ‘नाळ’ ने प्रेक्षकांशी नाळ जोडली. राष्ट्रीय पुरस्कारावरही मोहोर उमटवली. आता ‘नाळ भाग 2’ लवकरच पहिल्या भागातील आठवणींचा खजिना मोठा चैतू पुन्हा उलगडणार आहे.

पहा टीझर 2

काही दिवसांपूर्वीच या चित्रपटातील ‘भिंगोरी’ हे गाणं प्रेक्षकांच्या भेटीला आलं होतं. या गाण्याला मास्टर अवन, कडुबाई खरात, मनीष राजगिरे आणि नागेश मोरवेकर यांचा आवाज लाभला आहे. मराठी लोकगायिका कडुबाई खरात यांच्या आवाजातील हे पहिलंच चित्रपट गाणं आहे. औरंगाबादच्या कडुबाई खरात या डॉ. आंबेडकर यांच्यावर गाणी गाण्यासाठी ओळखल्या जातात. ‘मह्या भीमानं सोन्यानं भरलिया ओटी..’ हे त्यांचं गाणं सोशल मीडियावर प्रचंड व्हायरल झालं होतं. कडुबाई या बाबासाहेबांवरील गाणं म्हणून मिळणाऱ्या भिक्षेवर आपलं घर चालवतात. त्यांना पहिल्यांदाच चित्रपटात गाण्याची संधी मिळाली आहे. ‘सैराट’ फेम दिग्दर्शक नागराज मंजुळेंनी ही संधी दिली आहे.