Shah Rukh Khan | ‘शाहरुखला अभिनय येत नाही, तो हँडसमसुद्धा नाही’; अभिनेत्रीच्या टीकेवरून चाहते संतापले
महनूरची ही मुलाखत चांगलीच व्हायरल होत असून त्यावर नेटकऱ्यांकडून विविध प्रतिक्रिया येत आहेत. 'ही काहीही बडबडतेय, शाहरुखसारखा अभिनेता कोणताच नाही', असं एकाने लिहिलं. तर 'तू चुकीची आहेत. तुझ्या मताने आम्हाला काही फरक पडत नाही', असं दुसऱ्या युजरने म्हटलं आहे.
लाहौर : बॉलिवूडचा किंग अर्थात अभिनेता शाहरुख खानचे चाहते केवळ भारतातच नाही तर संपूर्ण जगभरात आहेत. देशाबाहेरील चाहत्यांकडून शाहरुखला कायमच भरभरून प्रेम मिळालं. त्याच्या चित्रपटांना आणि भूमिकांना चाहत्यांनी अक्षरश: डोक्यावर उचलून घेतलं. मात्र नुकत्याच एका अभिनेत्रीने शाहरुखबद्दल अशी प्रतिक्रिया दिली आहे, जे ऐकून त्याचे चाहते संतापले आहेत. या अभिनेत्रीने केवळ त्याच्या दिसण्यावरूनच नाही तर अभिनयावरूनही नकारात्मक टिप्पणी केली आहे. ही अभिनेत्री पाकिस्तानी फिल्म इंडस्ट्रीतील असून तिचं नाव महनूर बलोच असं आहे.
महनूर म्हणाली, “शाहरुख खानचं व्यक्तीमत्त्व चांगलं आहे, पण तुम्ही जर ब्युटी पॅरामीटरच्या हिशोबाने त्याच्याकडे पाहिलंत तर त्यात तो फिट बसत नाही. फक्त त्याचं व्यक्तिमत्त्व आणि ऑरा इतका मजबूत आहे की तो इतरांना आवडू लागतो. त्याच्या ऑरा खूप चांगला आहे. मात्र असे अनेक सुंदर लोक आहेत ज्यांच्याकडे इतरांना आकर्षित करणारा ऑरा नसतो. त्यामुळे लोकांचं त्यांच्याकडे लक्ष वेधलं जात नाही.”
महनूर फक्त इतक्यावरच थांबली नाही तर ती पुढे म्हणाली, “शाहरुखबद्दल माझं असं मत आहे की त्याला अभिनय येत नाही. तो चांगला बिझनेसमॅन आहे, त्याला हे खूप चांगल्या पद्धतीने माहीत आहे की मार्केटिंग कसं केलं जातं? कदाचित त्याचे चाहते आणि इतर काही लोक माझ्या या मताशी सहमत नसतील, पण ठीक आहे. त्याचं व्यक्तीमत्त्व उत्तम आहे. मात्र असे अनेक अभिनेते आहेत, जे त्याच्याइतके यशस्वी नाहीत.”
महनूरची ही मुलाखत चांगलीच व्हायरल होत असून त्यावर नेटकऱ्यांकडून विविध प्रतिक्रिया येत आहेत. ‘ही काहीही बडबडतेय, शाहरुखसारखा अभिनेता कोणताच नाही’, असं एकाने लिहिलं. तर ‘तू चुकीची आहेत. तुझ्या मताने आम्हाला काही फरक पडत नाही’, असं दुसऱ्या युजरने म्हटलं आहे.
दरम्यान शाहरुख खानला लॉस एंजिलिसमध्ये शूटिंगदरम्यान दुखापत झाल्याचं वृत्त कळताच चाहत्यांनी त्याच्या प्रकृतीविषयी काळजी व्यक्त केली. आगामी एका प्रोजेक्टसाठी शूटिंग सुरू असताना त्याच्या नाकाला दुखापत झाल्याची माहिती होती. नाकातून रक्तस्राव होऊ लागल्याने त्याला तातडीने तिथल्या रुग्णालयात दाखल करण्यात आलं आणि नाकावर सर्जरी झाल्याचं म्हटलं गेलं होतं. या चर्चांदरम्यान नुकतंच शाहरुखला मुंबई विमानतळावर पाहिलं गेलं. बुधवारी पहाटे शाहरुख मुंबईत परतला आणि यावेळी तो नेहमीप्रमाणे फिट अँड फाइन दिसत होता.
