प्राजक्ता माळीचा मोठा निर्णय, दागिन्यांच्या ब्रँडचं नाव बदललं; म्हणाली “प्राजक्तराजमुळे अडथळे..”
अभिनेत्री प्राजक्ता माळीने तिच्या दागिन्यांच्या ब्रँडबद्दल मोठा निर्णय घेतला आहे. नवीन आर्थिक वर्षापासून तिने ब्रँडचं नाव बदललं आहे. हे नवीन नाव काय आहे आणि त्यामागचं नेमकं कारण काय, याविषयी तिने व्हिडीओद्वारे माहिती दिली आहे.
अभिनेत्री प्राजक्ता माळीने अभिनयासोबतच उद्योग क्षेत्रातही आपला विशेष ठसा उमटविला आहे. जवळपास तीन वर्षांपूर्वी तिने पारंपरिक इमिटेशन दागिन्यांचा ‘प्राजक्तराज’ हा ब्रँड लाँच केला होता. हा ब्रँड महाराष्ट्रातून हळूहळू देशभरात आणि त्यानंतर जगभरात पोहोचला. आता 2026 च्या नवीन आर्थिक वर्षात तिने या ब्रँडबद्दल मोठा निर्णय घेतला आहे. इन्स्टाग्रामवर व्हिडीओ पोस्ट करत तिने या निर्णयाबद्दलची सर्वांना माहिती दिली आहे. प्राजक्ताच्या दागिन्यांच्या ब्रँडचं नाव आता बदललं असून ते ‘प्राजक्तसाज’ असं ठेवण्यात आलं आहे. यामागचं कारण तिने या व्हिडीओमध्ये सांगितलं आहे.
काय म्हणाली प्राजक्ता?
“31 मार्चपासून नवीन आर्थिक वर्षात माझ्या ज्वेलरी ब्रँडचं नाव असणार आहे, प्राजक्तसाज.. Reviving Maharashtra’s Legacy. ही खूप मोठी गोष्ट आहे. तीन-सव्वा तीन वर्षांपूर्वी मी जेव्हा हा ब्रँड सुरू केला, तेव्हा मला बिझनेसविषयी काहीच कल्पना नव्हती. एकच विचार होता की महाराष्ट्रातले मराठी दागिने, कालातीत होत असलेले दागिने अशांना पुन्हा झळाळी देण्याचा होता. तेव्हा बिझनेसचा एवढा विचार केला नव्हता. जसा ब्रँड मोठा होत गेला, तसा तो केवळ महाराष्ट्रातच नाही तर देशभरात आणि जहभरात पोहोचेल याचीही कल्पना केली नव्हती. परंतु शिपिंग करताना काही अडथळे आले आणि त्यातून मार्ग काढताना हे नवीन नाव सुचलेलं आहे,” असं प्राजक्ताने सांगितलं आहे.
View this post on Instagram
याविषयी ती पुढे म्हणाली, “आम्हाला लोगो पण बदलायचा होता, परंतु त्याच्याइतका अनोखा लोगो डिझाइन आम्हाला मिळाला नाही. मला अर्थातच नावातलं प्राजक्त बदलायचं नव्हतं. दागिन्यांचा ब्रँड हा साजमुळे प्रस्थापित होतो. त्यामुळे प्राजक्तराज.. पारंपरिक मराठी साज यापैकी पहिलं आणि शेवटचं नाव घेऊन ‘प्राजक्तसाज’ असं नवीन नाव ठेवलं. अर्थात अजून बरीच कारणं आहेत, जी मी तुम्हाला सांगू शकणार नाही, तुम्हाला ती कळणार नाहीत. पण माझा पूर्ण विश्वास आहे की जे होतं ते चांगल्यासाठीच होतं. ”
या ब्रँडअंतर्गत प्राजक्ता माळीने महाराष्ट्राच्या अनेक पारंपरिक दागिन्यांना पुन्हा एक नवी ओळख मिळवून देण्याचा प्रयत्न केला. महाराष्ट्रातून सुरू झालेला हा ब्रँड आता जगभरात पोहोचला आहे. त्याचा खप संपूर्ण भारतात आणि भारताबाहेरही वाढल्याची माहिती प्राजक्ताने या व्हिडीओतून दिली.
