Prakash Raj | ‘जर तुम्ही माझ्या भाषेचा अनादर केला तर..’, हिंदी भाषेच्या वादावर प्रकाश राज यांचं सडेतोड उत्तर
सुप्रीम कोर्टाचे वकील शशांक शेखर यांनी अभिनेते प्रकाश राज यांच्यावर एफआयआर दाखल करण्याची मागणी केली आहे. त्यावर आता प्रकाश राज यांनी उत्तर दिलं आहे. त्यांच्या एका जुन्या फोटोवरून या वादाची सुरुवात झाली आहे.
मुंबई : अभिनेते प्रकाश राज यांचा तीन वर्षांपूर्वींचा वाद पुन्हा एकदा चर्चेचा विषय ठरला आहे. 13 सप्टेंबर 2020 रोजी हिंदी दिनानिमित्त त्यांनी एक फोटो पोस्ट केला होता. या फोटोमधील त्यांच्या टी-शर्टवर हिंदी भाषेविषयी मजकूर लिहिण्यात आला होता. ‘मला हिंदी माहित नाही, जा’ असं त्यावर लिहिलेलं होतं. आता जवळपास तीन वर्षांनंतर त्यावरून वाद निर्माण झाला आहे. सुप्रीम कोर्टाचे वकील शशांक शेखर यांनी प्रकाश राज यांचा हा फोटो ट्विट करत त्यांच्याविरोधात एफआयआर दाखल केल्याची मागणी केली आहे. या पोस्टमध्ये त्यांनी तमिळनाडू पोलिसांनाही टॅग केलं आहे. त्यावर प्रकाश राज यांनी ट्विट करत उत्तर दिलं आहे.
प्रकाश राज यांचं ट्विट-
‘मी सात भाषा बोलतो. एखादी भाषा बोलणं आणि शिकणं म्हणजे त्या भाषेच्या लोकांचा आदर करणे होय. मी ज्या ज्या लोकांसोबत काम केलंय, त्या प्रत्येकाची भाषा मी शिकलोय. मी माझी भाषा कोणावर थोपत नाही. पण जर तुम्ही माझ्या भाषेचा अनादर करत असाल आणि तुमची भाषा माझ्यावर थोपवण्याचा प्रयत्न करत असाल तर मी त्याविरोधात उभा राहीन आणि त्याचा विरोध करेन’, असं ट्विट त्यांनी केलंय. या ट्विटमध्ये त्यांनी #stopHindiImposition म्हणजेच हिंदी थोपवणं थांबवा असा हॅशटॅग वापरला आहे.
I speak 7 languages .To learn n speak a language is RESPECTING its people . I have learned every language of the people I work with. I don’t force my language. But if you disrespect mine and force your language I will stand up and protest #stopHindiImposition #justasking
— Prakash Raj (@prakashraaj) March 7, 2023
प्रकाश राज यांच्याविरोधात FIR दाखल करण्याची मागणी
प्रकाश राज यांचा तीन वर्षांपूर्वींचा फोटो शेअर करत सुप्रीम कोर्टाचे वकील शशांक यांनी तमिळनाडू पोलिसांना सवाल केला. ‘तुम्ही त्यांच्याविरोधात एफआयआर दाखल केली का’, असा प्रश्न त्यांनी विचारला. त्यावरही प्रकाश राज यांनी उत्तर दिलं आहे. ‘माझं मूळ, माझी मातृभाषा कन्नड आहे. जर तुम्ही त्याचा अपमान करत असाल, त्याचा आदर करत नसाल आणि तुमची भाषा माझ्यावर थोपवण्याचा प्रयत्न करत असाल तर मी तुमचा विरोध करणार. तुम्ही मला धमकी देताय का? सहज विचारतोय’, असं त्यांनी लिहिलं होतं.
ನನ್ನ ಬೇರು.. ನನ್ನ ಮೂಲ ನನ್ನ ಕನ್ನಡ.. ನನ್ನ ತಾಯನ್ನು ಗೌರವಿಸದೆ ನಿನ್ನ ಹಿಂದಿಯನ್ನು ಹೇರಿದರೆ ನಾವು ಹೀಗೇ ಪ್ರತಿಭಟಿಸುತ್ತೇವೆ .. ಹೆದರೊಲ್ಲ..ಅಷ್ಟೇ..My roots..my mother tongue is KANNADA .. if you DISRESPECT her and try to FORCE your language.. we will PROTEST like this. R u threatening #justasking pic.twitter.com/JaRLOhGKTT
— Prakash Raj (@prakashraaj) March 6, 2023
2020 मध्ये हिंदी दिवसानिमित्त दुसऱ्या राज्यातील अभिनेत्यांवर हिंदी भाषा थोपवण्याचा विरोध प्रकाश राज यांनी केला होता. हिंदी भाषा थोपवण्याच्या विरोधात बोलणाऱ्या अभिनेत्यांमध्ये धनंजय, प्रकाश राज आणि वशिष्ठ एन सिम्हा यांचा सहभाग होता. सोशल मीडियावर त्यांनी आपापल्या अंदाजात हिंदी दिवसबद्दल मत व्यक्त केलं होतं. आता त्याच पोस्टवर तीन वर्षांनंतर एफआयआर दाखल करण्याची मागणी होत आहे.
