Priyanka Chopra | नाकाच्या सर्जरीदरम्यान प्रियांकासोबत घडली ‘ही’ घटना; बिघडला चेहरा, बऱ्याच वर्षांनंतर खुलासा
डॉक्टरांनी नंतर तिला आणखी एक सर्जरी करण्याचा सल्ला दिला होता. मात्र या दुसऱ्या सर्जरीसाठी प्रियांका बरीच घाबरली होती. अशा वेळी तिच्या वडिलांनी तिला समजावलं आणि सर्जरीच्या वेळी ते तिच्यासोबत राहिले.
मुंबई : बॉलिवूडची ‘देसी गर्ल’ अर्थात अभिनेत्री प्रियांका चोप्रा सध्या तिच्या पर्सनल आणि प्रोफेशनल आयुष्याबद्दल काही धक्कादायक खुलासे करताना दिसत आहे. नुकत्याच दिलेल्या एका मुलाखतीत तिने एका अशा घटनेचा उल्लेख केला, ज्यामुळे तिचा चेहरा पूर्णपणे बदलला होता. एका सर्जरीदरम्यान प्रियांकाचा चेहराच बिघडला होता. बॉलिवूडमधील करिअर सुरू होण्याआधीच संपलंय, अशी भीती तिला वाटू लागली होती. या घटनेमुळे तिने नैराश्याचाही सामना केला. त्यातून सावरण्यासाठी प्रियांकाला बराच काळ लागला.
नुकतीच प्रियांका SiriusXM या शोमध्ये पोहोचली होती. या शोमध्ये ती तिच्या आयुष्यातील चढउतारांविषयी आणि करिअरविषयी मोकळेपणे व्यक्त झाली. प्रियांकाने सांगितलं की तिच्या नाकाची सर्जरी बिघडली होती. त्यामुळे तिचा चेहरासुद्धा विचित्र दिसत होता. इतकंच नव्हे तर तिला श्वास घेतानाही त्रास जाणवत होता. डॉक्टरने प्रियांकाला सांगितलं होतं की तिचे नोज टिश्यू वाढले आहेत आणि त्यासाठी सर्जरी करावी लागेल. मात्र सर्जरीदरम्यान चुकून तिचा नोज ब्रिज कापला गेला होता. प्रियांकाने सांगितलं की हा तिच्या आयुष्यातील सर्वांत वाईट काळ होता.
सर्जरी बिघडल्याने प्रियांकाचा चेहरासुद्धा बराच बदलला होता. तिला दिवसरात्र फक्त तिच्या लूक्सची चिंता सतावत होती. त्यादरम्यान प्रियांकाला बऱ्याच प्रोजेक्ट्सवर पाणी सोडावं लागलं होतं. हे सर्व होत असताना प्रियांकाने नैराश्याचा सामना केला. तिने घराबाहेर पाऊल ठेवणंही बंद केलं होतं. माझं करिअर सुरू होण्याआधीच संपलंय, अशी भीती तिला सतावू लागली होती.
View this post on Instagram
डॉक्टरांनी नंतर तिला आणखी एक सर्जरी करण्याचा सल्ला दिला होता. मात्र या दुसऱ्या सर्जरीसाठी प्रियांका बरीच घाबरली होती. अशा वेळी तिच्या वडिलांनी तिला समजावलं आणि सर्जरीच्या वेळी ते तिच्यासोबत राहिले. वडिलांमुळेच त्या कठीण काळावर मात करू शकले, असं प्रियांका म्हणाली.
प्रियांका सध्या तिच्या ‘सिटाडेल’ या हॉलिवूड सीरिजमुळे चर्चेत आहे. याशिवाय तिचा ‘लव्ह अगेन’ हा हॉलिवूड चित्रपटसुद्धा लवकरच प्रदर्शित होणार आहे. गेल्या काही दिवसांपासून प्रियांका तिच्या चित्रपटाचं आणि सीरिजचं जोरदार प्रमोशन करताना दिसतेय.
