‘बिग बॉस’ फेम अभिनेत्री आयसीयूमध्ये, पाचव्या केमोनंतर प्रकृती गंभीर; 15व्या वर्षीच जाणवली होती गाठ
'बिग बॉस मल्याळम 7'ची स्पर्धक रेणू सुधीच्या चाहत्यांसाठी धक्कादायक बातमी समोर येत आहे. रेणूची प्रकृती अत्यंत गंभीर असून तिच्यावर आयसीयूमध्ये उपचार सुरू आहेत.
‘बिग बॉस मल्याळम 7’मुळे चर्चेत आलेली अभिनेत्री आणि कंटेंट क्रिएटर रेणू सुधीची प्रकृती सध्या गंभीर आहे. कॅन्सरशी लढा देत असलेल्या रेणूवर उपचार सुरू असून पाचव्या केमोथेरपीनंतर तिची प्रकृती अचानक बिघडली. सध्या तिला केरळमधील कोट्टायम मेडिकल कॉलेजच्या आयसीयूमध्ये दाखल करण्यात आलं आहे. रेणूची मैत्रीण आणि ‘बिग बॉस मल्याळम 7’मधील सहस्पर्धक सारिका केबी हिने सोशल मीडियावर व्हिडीओ शेअर करत तिच्या प्रकृतीबाबत माहिती दिली. सारिकाने दिलेल्या माहितीनुसार, रेणूची प्लेटलेट्सची संख्या मोठ्या प्रमाणात कमी झाली आहे. त्यामुळे तिची प्रकृती चिंताजनक बनली असून डॉक्टरांच्या देखरेखीखाली तिच्यावर उपचार सुरू आहेत.
याआधीच्या केमोथेरपीनंतर काही दिवस आराम करून रेणू पुन्हा सोशल मीडियावर व्हिडीओ शेअर करत होती. मात्र पाचव्या केमोनंतर परिस्थिती वेगळी झाली. दहा दिवस उलटल्यानंतरही तिला उठता येत नसल्याचं सारिकाने सांगितलं. रेणूला सध्या अन्न खाण्यातही अडचणी येत आहेत. त्यामुळे तिच्यासाठी PICC लाइनचा वापर करण्यात आल्याची माहिती सारिकाने दिली. तिच्या प्रकृतीमुळे पुढील केमोथेरपी देणं सध्या धोकादायक असल्याचं डॉक्टरांनी सांगितल्याचंही सारिकाने स्पष्ट केलं. त्यामुळे कुटुंबीय आणि चाहत्यांची चिंता वाढली आहे.
View this post on Instagram
15व्या वर्षी जाणवली होती शरीरात गाठ
रेणूने यावर्षी जूनमध्ये सोशल मीडियावर आपल्या कॅन्सरच्या आजाराबाबत खुलासा केला होता. तिने सांगितलं होतं की, वयाच्या 15व्या वर्षी तिला शरीरात एक गाठ जाणवली होती. मात्र त्यावेळी त्याचं गांभीर्य लक्षात आलं नव्हतं. पुढे वैद्यकीय तपासण्यांनंतर ही गाठ कॅन्सरशी संबंधित असल्याचं समोर आलं. रेणूने तिचा उपचाराचा प्रवास चाहत्यांसोबत शेअर करत कॅन्सरशी लढणाऱ्या इतरांना धीर देण्याचा प्रयत्न केला होता.
पतीच्या निधनानंतरही सुरू ठेवला संघर्ष
रेणू सुधी ही दिवंगत मल्याळम कॉमेडियन आणि मिमिक्री आर्टिस्ट कोल्लम सुधी यांची पत्नी आहे. जून 2023 मध्ये झालेल्या रस्ते अपघातात कोल्लम सुधी यांचं निधन झालं. त्यानंतर रेणूने सोशल मीडियावर आपली वेगळी ओळख निर्माण केली आणि कंटेंट क्रिएटर म्हणून काम सुरू केलं. त्यानंतर तिला ‘बिग बॉस मल्याळम 7’मध्ये सहभागी होण्याची संधी मिळाली. मात्र वैयक्तिक आणि भावनिक कारणांमुळे तिने शोमधून माघार घेतली होती.
रेणूच्या सध्याच्या प्रकृतीची माहिती समोर आल्यानंतर तिच्या चाहत्यांकडून चिंता व्यक्त केली जात आहे. सारिकानेही चाहत्यांना रेणूसाठी प्रार्थना करण्याचं आवाहन केलं आहे. तिच्यावर डॉक्टरांच्या देखरेखीखाली उपचार सुरू आहेत.
