WAVES 2025ला सैफ अली खानची हजेरी, म्हणाला ‘रामायण महाभारत…’
मुंबईत सुरू असलेल्या वर्ल्ड ऑडियो व्हिज्युअल एंटरटेनमेंट समिटच्या तिसऱ्या दिवशी बॉलिवूड अभिनेता सैफ अली खानने नेटफ्लिक्सचे सीईओ टेड सारँडोस यांच्यासोबत एका संवादात भाग घेतला. यावेळी टेडने सैफचे कौतुक केले. तर सैफने स्ट्रीमिंग प्लॅटफॉर्मला भारतीय अभिनेत्यांसाठी सर्वात जास्त स्वातंत्र्य देणारी गोष्ट असल्याचे सांगितले.
मुंबईत सध्या मुकेश अंबानी यांच्या वर्ल्ड जिओ सेंटरमध्ये वर्ल्ड ऑडियो व्हिज्युअल एंटरटेनमेंट समिट (WAVES 2025) आयोजित केले जात आहे. 1 मे पासून सुरू झालेल्या या समिटचा समारोप 4 मे रोजी होणार आहे. चार दिवसीय या समिटच्या पहिल्या दिवशी पंतप्रधान मोदींनी हजेरी लावली होती.
पंतप्रधान मोदींनी अक्षय कुमार, रजनीकांत, रणबीर कपूर, करण जोहर आणि शाहरुख खान यांच्यासह अनेक चित्रपट क्षेत्रातील दिग्गजांना संबोधित केले होते. समिटमध्ये दररोज एकामागून एक सेलिब्रिटी सहभागी होत आहेत. आता बॉलिवूड अभिनेता सैफ अली खाननेही समिटमध्ये भाग घेतला आणि त्याने स्ट्रीमिंग प्लॅटफॉर्म ओटीटीचे कौतुक करत याला भारतीय अभिनेत्यांसाठी स्वातंत्र्य देणारी गोष्ट असल्याचे सांगितले.
सैफने केले स्ट्रीमिंग प्लॅटफॉर्मचे कौतुक
वर्ल्ड ऑडियो व्हिज्युअल एंटरटेनमेंट समिटच्या तिसऱ्या दिवशी सैफ अली खानने नेटफ्लिक्सचे सीईओ टेड सारँडोस यांच्यासोबत एका फायरसाइड चॅटमध्ये भाग घेतला. यावेळी अभिनेत्याने सांगितले, “स्ट्रीमिंग प्लॅटफॉर्म भारत आणि जगभरातील अभिनेत्यांसाठी सर्वात जास्त स्वातंत्र्य देणारी गोष्ट आहे. चित्रपटांसाठी लेखन खूप स्पष्ट झाले आहे आणि ओटीटी तुम्हाला पात्रांसह खोलवर जाण्याची परवानगी देते, लांबलचक कथांना जिवंत करण्याची संधी देते. भारतात महाभारत, रामायण आणि अगदी पंचतंत्र यांसारख्या अनेक मोठ्या कथा आहेत. ओटीटीच्या माध्यमातून संपूर्ण जग हे पाहू शकते.”
नेटफ्लिक्सच्या सीईओने सैफला सांगितले मोठा स्टार
नेटफ्लिक्सचे सीईओ टेड सारँडोस यांनी सैफ अली खानचे कौतुक केले. ते म्हणाले, “आम्ही 9 वर्षांपूर्वी भारतात सेक्रेड गेम्सपासून सुरुवात केली होती. याने सिद्ध केले की चांगल्या कथा सीमा कशा ओलांडू शकतात. स्ट्रीमिंगचा प्रभाव म्हणजे प्रेक्षकांपर्यंत कंटेंट पोहोचवणे, जिथे ते आहेत.” पुढे ते म्हणाले, “सैफ अली खान एक उत्कृष्ट अभिनेता आहे. आम्ही 7 वर्षांपासून एकत्र काम करत आहोत. ते नेटफ्लिक्सवर येणारे आमचे पहिले मोठे स्टार होते.”
‘ज्वेल थीफ: द हाइस्ट बिगिन्स’मध्ये दिसत आहे सैफ
सैफच्या कामावर नजर टाकल्यास, अभिनेता सध्या ‘ज्वेल थीफ: द हाइस्ट बिगिन्स’मध्ये दिसत आहे. 25 एप्रिलपासून हा चित्रपट नेटफ्लिक्सवर स्ट्रीम झाला आहे. मात्र प्रेक्षकांचा या चित्रपटाला फारसा प्रतिसाद मिळालेला नाही. सैफसोबत यात जयदीप अहलावत, कुलभूषण खरबंदा, गगन अरोरा, कुणाल कपूर, निकिता दत्ता आणि सुमीत गुलाटी यांचाही समावेश आहे.
