वासराने बिलगावं गायीला तशीच मुलाची सानियाला घट्ट मिठी, फोटो पाहून काळजात नक्कीच कालवाकालव होईल
टेनिस स्टार सानिया मिर्झाचा घटस्फोट गेल्या काही दिवसांपासून सोशल मीडियावर चर्चेत आहे. अशातच तिने इन्स्टाग्रामवर एक फोटो पोस्ट केला आहे. वासराने गायीला बिलगावं तशीच मुलाने सानियाला घट्ट मिठी मारली आहे. या फोटोवर नेटकऱ्यांकडून कमेंट्सचा वर्षाव होतोय.
मुंबई : 17 फेब्रुवारी 2024 | भारताची स्टार टेनिसपटू सानिया मिर्झा गेल्या काही दिवसांपासून तिच्या खासगी आयुष्यामुळे सतत चर्चेत आहे. पाकिस्तानचा क्रिकेटर शोएब मलिक याने तिसऱ्या निकाहचे फोटो सोशल मीडियावर पोस्ट करत सर्वांना मोठा धक्का दिला होता. त्यानंतर सानियाच्या कुटुंबीयांकडून स्पष्ट करण्यात आलं की तिने शोएबला ‘खुला’ (इस्लाममधील घटस्फोट) दिला आहे. घटस्फोटानंतर सानियाची प्रत्येक सोशल मीडिया पोस्ट नेटकऱ्यांचं लक्ष वेधून घेत आहे. असाच एक फोटो तिने तिच्या इन्स्टाग्राम अकाऊंटवर पोस्ट केला आहे. ज्यामध्ये तिचा आणि शोएबचा मुलगा इझहान आईला घट्ट मिठी मारताना दिसत आहे.
सानियाने पोस्ट केलेल्या या फोटोमध्ये दोन लहान मुलं तिला बिलगून घट्ट मिठी मारताना दिसत आहेत. त्यापैकी एक हा सानिया आणि शोएबचा मुलगा इझहान आहे. या फोटोला तिने ‘लाइफलाइन्स’ असं कॅप्शन दिलं आहे. एखाद्या वासराने गायीला बिलगावं तशीच ही दोन्ही मुलं सानियाला बिलगली आहे. सानियाने पोस्ट केलेला हा फोटो फार भावूक असल्याचं नेटकरी म्हणत आहेत. अनेकांनी कमेंट करत तिला धीर देण्याचा प्रयत्न केला आहे. ‘तू फक्त स्ट्राँग खेळाडूच नाही तर स्ट्राँग भारतीय महिलासुद्धा आहेस’, असं एकाने म्हटलंय. तर ‘घटस्फोटाचा परिणाम निरागस मुलांनाही भोगावा लागतो’, असं दुसऱ्या युजरने लिहिलं आहे.
View this post on Instagram
शोएबला खुला दिल्यानंतर सानिया तिच्या मुलासह भारतात परतली आहे. नुकतीच तिने कोलकातामधील एका कार्यक्रमातही हजेरी लावली होती. शोएब मलिक आणि सानिया मिर्झा यांनी 2010 मध्ये हैदराबादमध्ये मुस्लीम पद्धतीने निकाह केला होता. त्यानंतर पाकिस्तानमधील सियालकोटमध्ये वलिमा पार पडला होता. लग्नाच्या आठ वर्षांनंतर सानियाने मुलाला जन्म दिला. सानिया आणि शोएबचा मुलगा इझहान आता पाच वर्षांचा आहे. शोएबच्या विवाहबाह्य संबंधांना वैतागून सानियाने त्याला ‘खुला’ दिला, असं म्हटलं जात आहे. शोएबने पाकिस्तानी अभिनेत्री सना जावेदशी निकाह केला आहे.
शोएब आणि सना हे गेल्या तीन वर्षांपासून एकमेकांना डेट करत होते. याविषयी पाकिस्तानी पत्रकार नईम हनिफने एका पॉडकास्टमध्ये सांगितलं, “एका टेलिव्हिजन रिॲलिटी शोदरम्यान सना आणि शोएब यांची पहिल्यांदा भेट झाली होती. या शोदरम्यान दोघांची खूप चांगली मैत्री झाली आणि हळूहळू या मैत्रीचं प्रेमात रुपांतर झालं. त्यानंतर शोएब जेव्हा कधी टीव्हीवर यायचा, तेव्हा तो सनालाही सोबत आणण्याबद्दल आग्रह करायचा.”
