Sunil Lahri : येणारा काळ संकटांनी भरलेला…’रामायण’ फेम सुनील लहरींचं वक्तव्य, कारण काय?

रामानंद सागर यांच्या ‘रामायण’ मालिकेतील प्रसिद्ध अभिनेते सुनील लहरी यांना भविष्याची काळजी आहे. सुनील यांनी सोमवारी रात्री १० वाजता एक व्हिडिओ शेअर करून आपल्या देशवासियांना सावध केलं आहे. ‘येणारा काळ संकटांनी भरलेला असू शकतो,आपण एकत्र येऊन त्यांचा सामना करण्यासाठी सज्ज राहिलं पाहिजे.’ असं सुनील यांनी म्हटलं आहे.

१९८७ च्या ‘रामायण’ या टीव्ही मालिकेत लक्ष्मणाची भूमिका साकारून प्रसिद्ध झालेल्या सुनील लाहरी यांनी २ मिनिटे २० सेकंदांच्या व्हिडिओमध्ये ‘अल निनो’ या घटनेवर आणि पर्जन्यमान, शेती व जीवनावश्यक वस्तूंच्या उपलब्धतेवर होणाऱ्या संभाव्य परिणामांवर चर्चा केली आहे.

सुनील लहरी यांचा व्हिडिओ

सुनील लहरी म्हणाले, ‘नमस्कार मित्रांनो, आजकाल ‘अल निनो’ या शब्दाची खूप चर्चा होत आहे. याचा संबंध निसर्ग, हवामान आणि वातावरणातील बदलांशी आहे. तुम्हाला याबद्दल अधिक जाणून घ्यायचं असेल, तर तुम्ही गुगलवर शोधू शकता. हा अल निनो जगभरात, विशेषतः आशियाई देशांमध्ये आणि आपल्या देशातही मोठ्या आपत्त्या आणेल. हवामान बदलल्यामुळे खूप उष्णता वाढेल, ज्यामुळे पाण्याची मोठी टंचाई निर्माण होईल. पिकांचं नुकसान होईल आणि खतांचाही तुटवडा निर्माण होईल, कारण आपण खतं आणि इंधनासाठी परदेशी देशांवर अवलंबून आहोत. आपल्याकडे पैसे असले तरी आपण त्याचं काहीही करू शकत नाही. जर वस्तू अस्तित्वात नसतील, तर आपण त्यांचं काय करणार?’

‘म्हणून आता प्रत्येक गोष्टीची थोडी बचत करण्याची वेळ आली आहे. आपण खूप हुशार आहोत. भारतीयांना बचत करण्याची सवय आहे. आपल्याला संकटांशी लढण्याचीही सवय आहे. आपण न थांबता कोविड-१९ मधून वाचलो. त्याचप्रमाणे, मला खात्री आहे की आपण या संकटातूनही बाहेर पडू.’ सुनील म्हणतात की, त्यांचा व्हिडिओ लोकांना घाबरवण्यासाठी नाही. आपण सावधगिरी बाळगली पाहिजे, यासाठी हा व्हिडिओ शेअर केला आहे.

आगे आने वाला समय विपदाओं से भरा हो सकता है हमको एकजुट होकर उससे लड़ने के लिए तैयार रहना चाहिए कहते हैं आग लगाने पर कुआं नहीं खोदा जाता कुआं आग लगने की संभावना देख कर पहले खोदा जाता है होशियार रहे सतक रहे The times ahead may b full of disasters.We all should unite n ready2fight https://t.co/VLTz9uG8ql

— Sunil lahri (@LahriSunil) October 5, 2026

दरम्यान, सुनील यांच्या कामाबद्दल सांगायचं तर त्यांना रामानंद सागर यांच्या ‘रामायण’ मालिकेतील लक्ष्मणाच्या भूमिकेनं प्रसिद्धी मिळाली. यानंतर, ते ‘परम वीर चक्र’ (१९८८), ‘लव कुश’ (१९८८) आणि ‘सपनों की दुनिया’ (१९९५-१९९६) यांसारख्या टीव्ही मालिकांमध्ये दिसले. मोठ्या पडद्यावर त्यांनी ‘बहारों की मंझिल’ (१९९१), ‘आजा मेरी जान’ (१९९३), ‘जनम कुंडली’ (१९९५) आणि ‘अ डॉटर्स टेल: पंख’ (२०१७) या चित्रपटांमध्ये काम केलंय.