गोविंदा इम्प्रेस करण्यासाठी 15 व्या वर्षी सुनीताने केलेली ही गोष्ट, त्यानंतर गुपचूप केलेलं लग्न

बॉलिवूड अभिनेता गोविंदाची पत्नी सुनीता आहुजा नेहमीच आपल्या स्पष्टवक्तेपणामुळे आणि मजेशीर किस्स्यांमुळे चर्चेत असते. ती अनेकदा आपल्या वैवाहिक आयुष्याबद्दल खुल्या दिलाने बोलताना दिसते. नुकत्याच एका मुलाखतीदरम्यान तिने गोविंदाला इम्प्रेस करण्यासाठी अवघ्या 15व्या वर्षी स्वयंपाक शिकल्याचा रंजक खुलासा केला.

सुनीता आहुजाने तिची मुलगी टिना आहुजा हिच्यासोबत ‘माँ है ना’ या शोमध्ये आपल्या वैवाहिक आयुष्याबद्दल अनेक गोष्टी सांगितल्या. शोदरम्यान तिने स्वयंपाकाची आवड आहे का, असा प्रश्न विचारण्यात आला. त्यावर उत्तर देताना तिने हसत म्हटले, स्वयंपाक करूनच नवऱ्याला पटवलं आहे. यावेळी तिने सांगितले की, गोविंदाला खाण्याची खूप आवड असल्यामुळे तिने लहान वयातच स्वयंपाक शिकण्यास सुरुवात केली होती. माझं लग्न खूप लवकर झालं होतं आणि माझ्या नवऱ्याला खाण्याची खूप आवड होती असे ती म्हणाली. पुढे तिने सांगितले की, गोविंदाला प्रभावित करण्यासाठी तिने केवळ 15व्या वर्षीच स्वयंपाक शिकून घेतला होता.

किशोरवयातच फुललं प्रेम

गोविंदा आणि सुनीता आहुजा यांची जोडी बॉलिवूडमधील सर्वात लोकप्रिय आणि दीर्घकाळ एकत्र असलेल्या जोडप्यांपैकी एक मानली जाते. वृत्तांनुसार, दोघांची पहिली भेट कौटुंबिक ओळखीतून झाली होती. त्यानंतर हळूहळू त्यांच्यात प्रेम फुलले. त्या काळात गोविंदा सुमारे 21 वर्षांचे होते तर सुनीता फक्त 15 वर्षांच्या होत्या. दोघांनी काही काळ एकमेकांना डेट केल्यानंतर मार्च 1987 मध्ये गुपचूप लग्न केले. विशेष म्हणजे, त्या काळात गोविंदा बॉलिवूडमध्ये मोठे स्टार बनण्याच्या मार्गावर होता.

या दाम्पत्याला दोन मुले आहेत. मुलगी टीना ही अभिनय क्षेत्रात सक्रिय आहे तर मुलगा यशवर्धन आहुजा हा देखील चर्चेत असतो. गेल्या काही वर्षांत गोविंदा आणि सुनीता यांनी आपल्या नात्यातील चढ-उतार, कौटुंबिक जीवन आणि मतभेदांबद्दलही खुलेपणाने भाष्य केले आहे. त्यामुळेच ही जोडी चाहत्यांमध्ये अधिक लोकप्रिय झाली आहे. सुनीता आहुजाच्या या खुलाशानंतर सोशल मीडियावर अनेकांनी त्यांच्या प्रेमळ नात्याचे कौतुक केले आहे. गोविंदासाठी एवढ्या लहान वयात स्वयंपाक शिकण्याचा त्यांचा किस्सा चाहत्यांना विशेष आवडला आहे.