Nana Patekar: नाना पाटेकर यांच्या निधनावर अभिनेत्री तनुश्री दत्ताची पहिली प्रतिक्रिया, म्हणाली…

Nana Patekar Death News: ज्येष्ठ अभिनेते नाना पाटेकर यांच्या निधनाच्या बातमीने चित्रपटसृष्टीला धक्का बसला आहे. वयाच्या ७५ व्या वर्षी त्यांचे निधन झाले. प्राथमिक अहवालानुसार, हृदयविकाराच्या झटक्याने त्यांचे निधन झाले. आज गुरुवारी सकाळी गोव्यातील त्यांच्या घरी नाना पाटेकर बेशुद्ध अवस्थेत आढळले. त्यांना तातडीने रुग्णालयात दाखल करण्यात आले. डॉक्टरांनी त्यांना शुद्धीवर आणण्याचा प्रयत्न केला, परंतु ते प्रतिसाद देईनासे झाले आणि त्यांना मृत घोषित करण्यात आले. मिळालेल्या माहितीनुसार, डॉक्टरांनी सुमारे ४५ मिनिटे त्यांना शुद्धीवर आणण्याचा प्रयत्न केला, परंतु उपचार अयशस्वी ठरले. पहाटे सुमारे ५:२० वाजता त्यांना मृत घोषित करण्यात आले. आता त्यांच्या निधनाच्या बातमीवर अभिनेत्री तनुश्री दत्ताने आपली प्रतिक्रिया दिली आहे.

तनुश्री दत्ताने तिच्या इंस्टाग्राम स्टोरीवर एक व्हिडिओ शेअर केला आहे. व्हिडिओमध्ये ती म्हणाली, “मी बातमी ऐकली. माझ्याकडे आज खूप काम आहे तर मला त्यावर लक्ष केंद्रित करायचे आहे. मी लखनौमध्ये एका मोठ्या कार्यक्रमात सहभागी होत आहे आणि तो कार्यक्रम माझ्यासाठी खूप महत्त्वाचा आहे. माझा संपूर्ण दिवस कामात निघून जाईल. मला लाईव्हस्ट्रीम, पोस्ट, सर्व काही करायचे होते. मला माहितीये की संध्याकाळी संपूर्ण मीडियाचे लक्ष हे या ‘ईविल डेड’ वर असेल. त्यामुळे, मी यावर थोड्या वेळाने प्रतिक्रिया देईन. अर्थात त्यांच्या कुटुंबीयांप्रती मी माझ्या संवेदना व्यक्त करते.”

तनुश्री दत्ता आणि नाना पाटेकर वाद

नाना पाटेकर आणि तनुश्री दत्ता यांच्यात वाद होता. तनुश्री दत्ताने नाना पाटेकर यांच्यावर अनेक गंभीर आरोप केले होते. २०१८ मधील #MeToo चळवळीदरम्यान, तनुश्रीने आरोप केला होता की, २००८ च्या ‘हॉर्न ओके प्लीज’ या चित्रपटाच्या चित्रीकरणादरम्यान नाना पाटेकर यांनी तिचा विनयभंग केला होता. यानंतर हे प्रकरण अधिकच चिघळले आणि नाना पाटेकर यांच्या विरोधात गुन्हाही दाखल करण्यात आला. जून २०१९ मध्ये, पोलिसांनी महानगर दंडाधिकारी न्यायालयात ‘बी-सारांश अहवाल’ दाखल केला, ज्यात नानांविरुद्ध कोणताही पुरावा आढळला नसल्याचे म्हटले होते. २०२५ मध्ये नानांविरुद्ध दाखल केलेली तक्रार फेटाळण्यात आली होती.