लेकीचा शाळेतला अनुभव ऐकून अली असगरला अश्रू अनावर; पहा Video
यानंतर या शोची परीक्षक माधुरी दीक्षितनेदेखील अली असगरचं कौतुक केलं. अली असगरने 1987 मध्ये 'एक दो तीन चार' या मालिकेतून टीव्हीवर पदार्पण केलं.
‘द कपिल शर्मा शो’ या कॉमेडी शोमधून प्रेक्षकांना खळखळून हसवणारा कॉमेडियन अली असगर (Ali Asgar) सध्या ‘झलक दिखला जा 10’मध्ये (Jhalak Dikhhla Jaa 10) नाचताना दिसत आहे. आपण केवळ अभिनयातच नाही तर डान्समध्येही उत्कृष्ट आहोत, हे तो या कार्यक्रमातून सिद्ध करण्याचा प्रयत्न करतोय. नुकताच या शोच्या पुढच्या भागाचा प्रोमो सोशल मीडियावर शेअर करण्यात आला. यामध्ये अली असगर त्याच्या मुलीचा व्हिडीओ पाहून भावूक झाला.
शोदरम्यान अली असगरला त्याच्या मुलाचा आणि मुलीचा व्हिडिओ दाखवण्यात आला. या व्हिडिओमध्ये अलीच्या मुलीने सांगितलं की तिला तिचे वडील कॉमेडियन आहेत म्हणून शाळेत चिडवलं जातं. “चिडवणाऱ्या त्या लोकांना माहीत नाही की ते स्वतःचीच चेष्टा करत आहेत, कारण माझे वडील इतरांच्या चेहऱ्यावर हास्य आणण्याचं काम करतात,” असं ती पुढे म्हणते. आपल्या मुलीचे हे शब्द ऐकून अली असगरचे डोळे पाणावतात.
यानंतर या शोची परीक्षक माधुरी दीक्षितनेदेखील अली असगरचं कौतुक केलं. अली असगरने 1987 मध्ये ‘एक दो तीन चार’ या मालिकेतून टीव्हीवर पदार्पण केलं. यानंतर त्याने इतिहास, कहानी घर घर की, कुटूंब, कॉमेडी सर्कस, एफआयआर, जिनी और जुजू, कानपूर वाले खुराना आणि अकबर का बल बिरबल यांसारख्या लोकप्रिय मालिकांमध्ये काम केलं.
अली असगरने अनेक चित्रपटांमध्ये काम केलं आहे. 1991 मध्ये आलेल्या ‘शिकारी’ चित्रपटातून त्याने बॉलिवूडमध्ये पदार्पण केलं. यानंतर त्याने जान तेरे नाम, चमत्कार, खलनायक, जोरू का गुलाम, जोश, हम किसी से कम नहीं, ऐतबार, शादी नंबर 1, पार्टनर, संडे, जुडवा 2, पागलपंती आणि अमावस यांसारख्या चित्रपटांमध्ये काम केलं. आता झलक दिखला जा या डान्सिंग शोमध्येही तो प्रतिस्पर्ध्यांना जोरदार टक्कर देत आहे.
