Mazhi Tuzhi Reshimgaath: कोण आहे परीचा खरा बाबा? ‘माझी तुझी रेशीमगाठ’ मालिकेत नवीन एण्ट्री
'माझी तुझी रेशीमगाठ' या मालिकेत एका नव्या व्यक्तिरेखेची एण्ट्री होणार आहे. ही व्यक्तिरेखा नेहाच्या पहिल्या नवऱ्याची आहे. अविनाश असं त्याचं नाव असून चौधरी कुटुंबाच्या आनंदात तो विरजण घालणार आहे.
झी मराठी वाहिनीवर ‘माझी तुझी रेशीमगाठ’ (Mazhi Tuzhi Reshimgaath) या मालिकेने लोकप्रियतेचं शिखर गाठलं आहे. या मालिकेतील नेहा (Prarthana Behere) आणि यशची (Shreyas Talpade) जोडी आणि परीचा निरागस अभिनय प्रेक्षकांना भावला आहे. नुकतंच या मालिकेत नेहा आणि यशचा धूमधडाक्यात विवाहसोहळा पाहायला मिळाला. नेहा आणि यशाच्या लग्नामुळे चौधरी कुटुंबात आनंदाचे वातावरण पाहायला मिळत आहे. मात्र आता लवकरच त्यांच्या आनंदात विरजण पडणार आहे. नेहा आणि यशच्या सुखात मिठाचा खडा टाकण्यासाठी एका नवीन व्यक्तिरेखेची मालिकेत एण्ट्री झाली आहे. ही व्यक्तिरेखा आहे नेहाच्या पहिल्या नवऱ्याची. नुकतंच मालिकेत अविनाशची झलक पाहायला मिळाली. अविनाश त्याला परीसाठी ड्रायव्हर म्हणून अपॉईंट केलं असल्याचं सांगतो. अविनाश हा दुसरा तिसरा कोणी नसून नेहाचा पहिला नवरा आहे.
त्यामुळे आता परी आणि नेहाच्या सुखी आयुष्यात अविनाश नावाचं वादळ येणार आहे. तेव्हा त्यांची आयुष्य बदलणार की यश या वादळातून सगळ्यांना सुखरूप बाहेर काढणार हे पाहणं रंजक ठरेल. अविनाशची भूमिका अभिनेता निखिल राजेशिर्के साकारतोय. या भूमिकेबद्दल बोलताना निखिल म्हणाला, “माझी तुझी रेशीमगाठ ही मालिका अतिशय लोकप्रिय आहे आणि या मालिकेत एका रंजक वळणावर माझी महत्वपूर्ण भूमिकेत एण्ट्री झाली याचा मला खूप आनंद आहे. ही भूमिका आहे नेहाचा पहिला पती आणि परीचा बाबा अविनाशची. अविनाशला बघून नेहाची काय प्रतिक्रिया असेल आणि अविनाशचा नेहा आणि परीच्या आयुष्यात परत येण्याचा हेतू नक्की काय आहे हे प्रेक्षकांना पाहायला आवडेल.”
View this post on Instagram
नुकताच या मालिकेत नेहा आणि यशचा साखरपुडा, यशची बॅचलर पार्टी, नेहाची मेहंदी, हळद यामध्ये घडलेली धमाल मजामस्ती हे सर्व तर प्रेक्षकांनी पाहिलंच, पण सोबत यश आणि नेहाचा लग्नसोहळादेखील डोळे दिपून टाकेल असा शानदार पद्धतीने संपन्न झाला. या मालिकेच्या वटपौर्णिमा विशेष भागात नेहा आणि यशने आपली पहिली वटपौर्णिमा साजरी केली. या पूजेत यश जन्मोजन्मी नेहाच बायको म्हणून लाभु दे अशी प्रार्थना करतो. त्यानंतर आता मालिकेत अनेक रंजक घडामोडी घडणार आहेत. माझी तुझी रेशीमगाठ ही मालिका सोमवार ते शनिवार रात्री 8.30 वाजता झी मराठी वाहिनीवर प्रेक्षकांच्या भेटीला येते.
