The Bhootni Review: संजय दत्तचा ‘द भूतनी’ सिनेमा कसा आहे? काय आहे चित्रपटाची कथा?
संजय दत्त यांचा ‘द भूतनी’ हा चित्रपट आज थिएटरमध्ये प्रदर्शित झाला आहे. या चित्रपटात संजय दत्तसोबत मौनी रॉय आणि पलक तिवारी देखील आहेत. जर तुम्हीही हा हॉरर कॉमेडी चित्रपट थिएटरमध्ये पाहण्याचा प्लॅन करत असाल, तर आधी हा रिव्ह्यू नक्की वाचा...
बॉलिवूडमध्ये हॉरर चित्रपटांच्या चाहत्यांची कमी नाही, पण गेल्या काही वर्षांत हॉरर-कॉमेडीचे रंजक मिश्रण आपल्याला पाहायला मिळाले आहेत आणि कथाकथनाच्या या नव्या ट्रेंडने प्रेक्षकांना खूपच आकर्षित केले आहे. हाच ट्रेंड पुढे नेत संजय दत्तने ‘द भूतनी’ या नव्या हॉरर-कॉमेडी चित्रपटासह बॉक्स ऑफिसवर एन्ट्री केली आहे. संजय दत्तचा भूतनी श्रद्धा कपूरच्या ‘स्त्री’सारखी अप्रतिम नाही. पण हा चित्रपट तुमचं ठीकठाक मनोरंजन करतो. संपूर्ण चित्रपटात संजय दत्तने जीव ओतला आहे. मोठ्यांपेक्षा लहान मुलांना हा चित्रपट जास्त आवडेल. चला आता चित्रपटाबद्दल सविस्तर बोलूया.
काय आहे चित्रपटाची कथा
कथेची सुरुवात होते व्हर्जिन ट्रीपासून. सेंट व्हिन्सेंट कॉलेजमध्ये उभ्या असलेल्या या झाडाला काही लोक शापित समजतात. असं म्हणतात की या झाडावर राहणारी एक भूतनी दरवर्षी व्हॅलेंटाईन डेच्या दिवशी जागी होते. खऱ्या प्रेमाच्या शोधात ही भूतनी दरवर्षी कोणाला तरी टारगेट करते आणि व्हॅलेंटाईन डेला भूतनीने टारगेट केलेला मुलगा होळीच्या दिवशी मरतो. यावर्षी शांतनु (सनी सिंह) भूतनीचा टारगेट बनला आहे आणि या भूतापासून सुटका करण्यासाठी कॉलेज प्रशासन ‘घोस्टबस्टर’ कृष्णा त्रिपाठी (संजय दत्त) यांना बोलावतं. आता हे घोस्टबस्टर भूतनीचा खातमा करू शकेल की या कथेत काही नवं ट्विस्ट येईल? हे जाणून घेण्यासाठी तुम्हाला थिएटरमध्ये जाऊन ‘द भूतनी’ पाहावा लागेल.
चित्रपट कसा आहे?
भीतीदायक कथेच्या नावाखाली आपल्यासमोर सादर केलेल्या या चित्रपटात भीती कमी आणि कॉमेडी जास्त आहे. म्हणूनच ‘द भूतनी’ हा चित्रपट अर्धवट वाटतो. ‘स्त्री’, ‘मुंज्या’ यांसारख्या चित्रपटांच्या तुलनेत या चित्रपटात हॉररच्या नावाखाली फक्त मौनी रॉयच्या किंचाळ्या ऐकू येतात. तिला पाहून अजिबात मजा येत नाही. चित्रपटातील कॉमेडी आणि संजय दत्तच्या अॅक्शनमुळे हा चित्रपट वाचला आहे. हा चित्रपट त्या जुन्या चित्रपटांसारखा आहे, ज्याला मेंदू घरी ठेवून एन्जॉय करावा. पहिल्या हाफमध्ये चित्रपट जितका कंटाळवाणा वाटतो, तितकाच दुसऱ्या हाफमध्ये तो पाहण्यात मजा येते.
दिग्दर्शन आणि लेखन
चित्रपटाचं दिग्दर्शन सिद्धांत सचदेव यांचं आहे आणि चित्रपटाची कथा देखील त्यांचीच आहे. स्क्रीनप्ले त्यांनी वंकुश अरोरा यांच्यासोबत मिळून लिहिलं आहे. ‘कॉमेडी सर्कस’साठी लेखन करणाऱ्या वंकुश यांनी या चित्रपटासाठीही अप्रतिम कॉमेडी संवाद लिहिले आहेत. पण पहिल्या हाफमध्ये कथा इतकी कंटाळवाणी होते की चांगली कॉमेडीही परिणामहीन वाटू लागते. कथेचा प्लॉट चांगला आहे, पण मुख्य मुद्द्यावर येण्यापूर्वी दिग्दर्शकाने सुरुवातीचे 20 मिनिटं वाया घालवली आहेत. चित्रपटात संजय दत्त यांची एण्ट्रीही उशिरा होते. त्याच्या एण्ट्रीनंतर चित्रपट थोडा रंजक बनतो आणि मग दुसऱ्या हाफमध्ये आपण तो एन्जॉय करू लागतो.
कसा आहे अभिनय?
जर कोणी आपल्याला सांगितलं की आधीच मेलेल्या भूताला वेगळ्या बंदुकीने मारलं तर ते मरू शकतं, तर आपण त्याला मूर्ख समजू. पण संजय दत्त त्यांच्या अॅक्शनने हा विश्वास देतो की त्याच्या बंदुकीने आणि इतर शस्त्रांनी तो भूतांना मारू शकतो. ‘वास्तव’पासून ‘अग्निपथ’ आणि ‘मुन्ना भाई एमबीबीएस’पर्यंत प्रत्येक चित्रपटात आपल्या अभिनयाच्या जोरावर संजय दत्त अशक्य गोष्टी शक्य करून दाखवतो आणि त्याचा सहज अभिनय पाहून आपणही नेहमीप्रमाणे त्याच्यावर विश्वास ठेवतो.
सनी सिंह ‘शांतनु’च्या भूमिकेत काही खास कमाल दाखवू शकत नाहीत. पलक चांगली आहे, तिने ‘किसी का भाई किसी की जान’मध्येही कमी स्क्रीन स्पेस मिळूनही आपली छाप सोडली होती. आसिफ खान आणि निकुंज शर्मा यांनीही चांगलं काम केलं आहे. ‘बी यूनिक’ या नावाने निकुंज कंटेंट क्रिएट करतो. तो या चित्रपटातील सरप्राइज पॅकेज आहे. मौनी रॉयच्या ‘भूतनी’मध्ये काही नवीनपण नाही. तिच्या प्रत्येक चित्रपटाप्रमाणे या चित्रपटातही ठीकठाकच अभिनय केला आहे. खरंतर चित्रपटात एक सीन आहे जिथे पलकला ‘भूतनी’ दाखवली आहे, हा सीन फक्त काही मिनिटांचा असेल, पण तिथे पलकने अभिनयाच्या बाबतीत मौनीला मागे टाकलं आहे.
पाहावा की नाही?
‘द भूतनी’ हा एकदाच पाहण्यायोग्य चित्रपट आहे. असे अनेक चित्रपट यापूर्वीही बनले आहेत आणि आपण त्यांचा खूप आनंदही घेतला आहे. पण आता प्रेक्षक आपलं मेंदू घरी ठेवून येत नाहीत. कोरोनानंतर ओटीटीवर इतकं कंटेंट उपलब्ध आहे की ‘द भूतनी’सारखे चित्रपट सहज घरी पाहिले जाऊ शकतात. या चित्रपटात ‘मडगांव एक्सप्रेस’सारखी ‘सुरुवातीपासून शेवटपर्यंत’ची कॉमेडी नाही आणि दिग्दर्शकाने ‘स्त्री’, ‘मुंज्या’प्रमाणे या चित्रपटातून काही ठोस संदेशही दिला नाही. पण जर तुम्ही संजय दत्तचे चाहते असाल, तर तुम्हाला हा चित्रपट खूप आवडेल. उन्हाळ्याच्या सुट्ट्यांमध्ये मुलांना हा चित्रपट नक्की दाखवता येईल, कारण त्यात दाखवलेलं हॉरर त्यांच्यासाठी अगदी योग्य आहे.
