Tiger Shroff: टायगर श्रॉफ प्रकरणात मोठी अपडेट; आरोपींची बस चुकली अन्.., तपासात धक्कादायक खुलासा

Tiger Shroff: अभिनेता टायगर श्रॉफच्या गाडीवर मुंबईतील जुहू परिसरात झालेल्या गोळीबार प्रकरणात तपासादरम्यान धक्कादायक माहिती समोर आली आहे. गोळीबार केल्यानंतर आरोपींनी पोलिसांच्या तावडीतून सुटण्यासाठी पळून जाण्याची योजना आखली होती. सुरतमधून बसने दिल्ली गाठून त्यानंतर नेपाळच्या सीमेत प्रवेश करण्याचा त्यांचा मूळ प्लॅन होता. मात्र, दिल्लीला जाणारी बस चुकल्याने त्यांना आपली योजना बदलावी लागली. मुंबई गुन्हे शाखेच्या तपासात आरोपींच्या हालचाली आणि त्यांनी आखलेल्या पळून जाण्याच्या कथित कटाचा उलगडा झाला आहे.

बस चुकली अन् आरोपींनी आखला दुसरा प्लॅन

तपासातील माहितीनुसार, टायगर श्रॉफच्या गाडीवर गोळीबार केल्यानंतर तिन्ही आरोपींनी मुंबई सोडून सुरत गाठलं. तिथून बसने दिल्लीला जाण्याची आणि पुढे नेपाळमध्ये प्रवेश करण्याची त्यांची योजना होती. मात्र, आरोपी बसस्थानकावर पोहोचले तेव्हा दिल्लीला जाणारी बस आधीच निघून गेली होती. त्यामुळे त्यांचा पहिला प्लॅन फसला. यानंतर या प्रकरणातील कथित सूत्रधार अनिल पंडित याने दुसरी योजना सक्रिय केल्याचा आरोप आहे. आरोपी अंकित खटकमार्फत व्हॉइस ओव्हर इंटरनेट प्रोटोकॉल (VoIP) कॉलद्वारे गोळीबार करणाऱ्यांना नव्या सूचना देण्यात आल्याचं तपासात समोर आलं आहे. या सूचनांनुसार आरोपींनी पुढील प्रवासाची दिशा बदलली.

फूल सिंग, रेहान अन्सारी आणि हृतिक कुमार या तिन्ही आरोपींनी ऑटो-रिक्षाने सुरत रेल्वे स्थानक गाठलं. त्यानंतर पहाटे सुमारे 1 वाजून 33 मिनिटांनी त्यांनी पुणे-जयपूर एक्स्प्रेस पकडली. रेल्वेने प्रवास करताना पोलिसांकडून तपासणी होण्याची भीती आरोपींना होती, असा तपास यंत्रणांचा दावा आहे. त्यामुळे ट्रेनमध्ये चढण्यापूर्वी त्यांनी गोळीबारासाठी वापरलेली दोन शस्त्रं आणि दारूगोळा सुरत बसस्थानकाजवळील एका मोकळ्या जागेत लपवल्याचा आरोप आहे.

आरोपींचा दुसरा प्लॅनही पोलिसांच्या तपासात महत्त्वाचा ठरला. जयपूरच्या बाहेरील मुख्य रेल्वे स्थानकावर ट्रेन पोहोचण्यापूर्वीच उतरून पुढील प्रवास रस्तेमार्गे करण्याच्या सूचना त्यांना देण्यात आल्याचं सांगितलं जात आहे. त्यानंतर बस किंवा टॅक्सीने दिल्लीच्या दिशेने जाऊन नेपाळच्या सीमेत प्रवेश करण्याचा त्यांचा प्रयत्न होता. मुंबई गुन्हे शाखेनं सुरत बसस्थानक आणि रेल्वे स्थानकावरील सीसीटीव्ही फुटेजच्या मदतीने आरोपींच्या हालचालींचा माग काढला. बस चुकल्यानंतर त्यांनी कोणता मार्ग निवडला, ट्रेन कशी पकडली आणि प्रवासादरम्यान काय केलं, याची माहिती तपासात पुढे आली.