Vijayendra Kumeria : 10 वर्षांचा संसार मोडकळीस, चार वर्षांपूर्वी काडीमोड; लोकप्रिय अभिनेत्याचा घटस्फोटाबद्दल खुलासा

सिनेइंडस्ट्रीतून कलाकारांच्या लग्नाच्या तसेच घटस्फोटाच्या बातम्या समोर येत असतात. अशातच आता एका अभिनेत्यानं त्याच्या घटस्फोटाची घोषणा केली आहे. टीव्ही अभिनेता विजयेंद्र कुमेरियानं त्याच्या वैयक्तिक आयुष्याबद्दल महत्वपूर्ण खुलासा केला आहे. ‘उडान’ फेम अभिनेत्यानं एका मुलाखतीत सांगितलं की, त्याचा प्रीती भाटियासोबत चार वर्षांपूर्वी घटस्फोट झाला आहे. या जोडप्याला किमाया नावाची मुलगी आहे. लग्नाच्या दहा वर्षांनी विजयेंद्र आणि प्रीती यांनी विभक्त होण्याचा निर्णय घेतला.

लग्नाच्या दहा वर्षांनी घटस्फोट

चार वर्षांनंतर, विजयेंद्र कुमेरियानं झूमला दिलेल्या मुलाखतीत खुलासा केला की, तो आणि प्रीती गेल्या चार वर्षांपासून विभक्त झाले आहेत. यापूर्वी, २०२३ मध्ये त्यांच्या वैवाहिक जीवनात मतभेद असल्याच्या बातम्या समोर आल्या होत्या. त्यावेळी, प्रीती भाटियानं या प्रकरणावर भाष्य करण्यास नकार दिला होता. आता अभिनेत्यानं स्वतः घटस्फोटाबद्दल माहिती दिली आहे.

विजयेंद्र आणि प्रीती यांची मुलगी किमायाचा जन्म २०१६ मध्ये झाला. प्रीती अनेकदा सोशल मीडियावर आपल्या मुलीसोबतचे फोटो शेअर करते. २०२४ मध्ये, किमायाच्या वाढदिवसानिमित्त, तिनं आपल्या मुलीसोबतचे काही फोटो शेअर केले होते. मात्र, प्रीतीच्या सोशल मीडिया अकाउंट्सवर विजयेंद्रसोबतचे फोटो क्वचितच दिसतात.

विजयेंद्र आणि प्रीतीने इन्स्टाग्रामवर एकमेकांना अनफॉलो केलं

जेव्हा त्यांच्या विभक्त होण्याची बातमी समोर आली, तेव्हा विजयेंद्र आणि प्रीतीने इन्स्टाग्रामवर एकमेकांना अनफॉलो केलं. प्रीती विजयेंद्रच्या प्रोडक्शन कंपनी, कुमेरिया प्रोडक्शन्सशी देखील जोडली गेली होती. मात्र, ती अजूनही कंपनीसोबत काम करत आहे की नाही, हे सध्या अस्पष्ट आहे. २०२१ मध्ये एका मुलाखतीदरम्यान, विजयेंद्रनं पत्नीचं कौतुक केलं होतं.

विजयेंद्रने अनेक टीव्ही मालिकांमध्ये काम केलं आहे

दरम्यान, विजयेंद्र कुमेरिया एक लोकप्रिय टीव्ही अभिनेता असून तो ‘शास्त्री सिस्टर्स’, ‘उडान’, ‘नागिन 4’ ‘दीवानियत’, आणि ‘जागृती: एक नई सुबह’ यांसारख्या मालिकांमध्ये दिसला आहे. तो सध्या ईशा सिंगसोबत ‘जुही मुई’ या मालिकेत इन्स्पेक्टर श्याम सिंगची भूमिका साकारत आहे.