‘ये रिश्ता क्या कहलाता है’ फेम अभिनेत्री रुग्णालयात दाखल; चाहत्यांनी व्यक्त केली काळजी

मुंबई : ‘ये रिश्ता क्या कहलाता है’ या लोकप्रिय मालिकेत नायराची भूमिका साकारणारी अभिनेत्री शिवांगी जोशीला रुग्णालयात दाखल करण्यात आलं आहे. शिवांगीला किडनी इन्फेक्शन झाल्याने तिला रुग्णालयात दाखल करण्यात आलं आहे. उपचारासाठी तिला पुढील काही दिवस रुग्णालयातच राहावं लागणार आहे. हॉस्पीटल बेडवरून शिवांगीने फोटो पोस्ट केला असून चाहत्यांना याविषयीची माहिती दिली. त्याचप्रमाणे आपल्या आरोग्याची काळजी घेण्याचं आवाहन तिने चाहत्यांना आणि मित्रमैत्रिणींना केलं आहे.

शिवांगीने या पोस्टमध्ये लिहिलं, ‘गेले काही दिवस जरा कठीण गेले आहेत. मला किडनी इन्फेक्शन झालं आहे. पण माझे कुटुंबीय, मित्रमैत्रिणी माझ्यासोबत आहेत. रुग्णालयात माझी खूप चांगली काळजी घेतली जात आहे. सध्या मला बरं वाटतंय. तुम्हीसुद्धा तुमच्या शरीराची, आरोग्याची काळजी घ्या. शरीरात पाण्याची कमी होऊ देऊ नका. मी लवकरच पुन्हा जोमाने कामाला लागेन. सध्या तब्येतीत बरीच सुधारणा आहे.’

शिवांगीच्या या पोस्टनंतर चाहत्यांनी कमेंट्सचा वर्षाव केला. ‘लवकर बरी हो, तुला खूप प्रेम’ असं एका युजरने लिहिलं. तर ‘काळजी घे’, असंही अनेकांनी म्हटलंय. श्रद्धा आर्या, श्वेता तिवारी, धीरज धूपर, रुबिना दिलैक, प्रित कमानी, चेतना पांडे, श्रेणू पारिख यांसारख्या कलाकारांनीही कमेंट करत तिच्या तब्येतीविषयी काळजी व्यक्त केली आहे.

View this post on Instagram

A post shared by शिवांगी जोशी (@shivangijoshi18)

शिवांगी लवकरच एकता कपूरच्या शोमध्ये झळकणार आहे. ‘ब्युटी अँड बीस्ट’ या शोमध्ये ती दुहेरी भूमिका साकारणार असल्याचं कळतंय. या शोच्या ओपनिंग एपिसोडच्या शूटिंगसाठी मोठी तयारी करण्यात आली आहे. जवळपास सात दिवस या ओपनिंग एपिसोडचं शूटिंग होणार आहे. तर पहिला एपिसोड हा एक तासाचा दाखवण्यात येणार आहे. शिवांगीने काही दिवसांपूर्वीच ‘बालिका वधू 2’ या मालिकेत भूमिका साकारली होती. शालीन भनोटच्या ‘बेकाबू’ या मालिकेतही ती पाहुण्या कलाकाराची भूमिका साकारणार आहे.

शिवांगीने ‘ये रिश्ता क्या कहलाता है’ या मालिकेत नायराची भूमिका साकारली होती. या भूमिकेमुळे तिला प्रचंड लोकप्रियता मिळाली. तिने ‘खतरों के खिलाडी’ या रिॲलिटी शोमध्येही भाग घेतला होता.