Jalgaon : गणपतीची आरती मुस्लिम बांधवांनी केली, हिंदू बांधवांनी… जळगावात 1970 पासूनची राष्ट्रीय एकात्मतेची अनोखी परंपरा कायम

जळगावमध्ये यंदाच्या गणेश विसर्जन मिरवणुकीत सामाजिक सलोख्याचे एक सुंदर चित्र पाहायला मिळाले. दरवर्षीप्रमाणे मुस्लिम बांधवांनी मोठ्या उत्साहात मानाच्या गणपतीचे स्वागत केले, तसेच गणपतीची आरती करून राष्ट्रीय एकात्मतेची परंपरा जपली. या वेळी उपस्थित मान्यवर आणि गणेश भक्तांचा सत्कारही करण्यात आला.

गणेशोत्सवाच्या बारा दिवसांनंतर गणपती बाप्पाला निरोप देण्याच्या या प्रसंगी, हिंदू बांधवांकडूनही सौहार्दाचा संदेश देण्यात आला. जिल्हाधिकारी, आयुक्त आणि महापौरांसारख्या मान्यवरांनी पीर लालशा बाबा यांच्या दर्ग्यावर चादर अर्पण केली. माजी उपनगराध्यक्ष सय्यद नियाज अली भैया यांनी १९७० सालापासून राष्ट्रीय एकात्मतेची ही परंपरा सुरू केली होती, ज्यामध्ये मुस्लिम बांधवांकडून गणपती मंडळांचे फुलांच्या पाकळ्यांनी स्वागत केले जाते आणि हिंदू बांधवांकडून दर्ग्यावर चादर अर्पण केली जाते. ही वर्षानुवर्षे चालत आलेली परंपरा जळगावच्या सामाजिक सलोख्याचे आणि एकोप्याचे प्रतीक आहे. हा उपक्रम शांततेचा आणि बंधुत्वाचा संदेश देत असून, हिंदू आणि मुस्लिम बांधवांमधील प्रेम पिढ्यानपिढ्या असेच कायम राहील, असा विश्वास या वेळी व्यक्त करण्यात आला.