बायांनो इकडे लक्ष द्या ! तिशीनंतर ‘या’ टेस्ट करूनच घ्या, अनेक आजांरापासून होईल बचाव

Health tests for women : आजकालची जीवनशैली अतिशय धावपळीची झालेली आहे. आजारांशी लढायचं असेल तर चांगली व निरोगी जीवनशैली आवश्यक आहे. प्रत्येक व्यक्तीने वेळोवेळी आरोग्याची तपासणी करून घेणेही तितकेच महत्त्वाचे आहे. विशेषतः महिलांसाठी हे खूप महत्वाचे आहे. कारण घरकाम आणि ऑफीसमधील जबाबदाऱ्या यामध्ये महिलांचे त्यांच्या तब्येतीकडे (woman health) दुर्लक्ष होते आणि नंतर त्यांच्या आरोग्याची काळजी घेणे कठीण होते. अशा परिस्थितीत अनेक आजारांचा धोका असतो. पण काही चाचण्या (important tests) आहेत ज्याद्वारे महिलांमध्ये होणारे काही प्रमुख आजार ओळखता येतात.

डॉक्टरांच्या सांगणायानुसार, ३० वर्षांनंतर प्रत्येक महिलेने काही चाचण्या करणे आवश्यक असते. त्यामुळे आजाराची योग्य वेळेत ओळख पटते व त्यावर उपाय करणेही सोपे होते. दरवर्षी एकदा तरी या चाचण्या करून घेतल्या पाहिजेत.

ब्रेस्ट व सर्व्हायकल कॅन्सर टेस्ट

महिलांमध्ये ब्रेस्ट कॅन्सर आणि सर्व्हायकल कॅन्सरचा (गर्भाशयाच्या मुखाचा) धोका सर्वाधिक असतो. वयाच्या ३० व्या वर्षांनंतर हे कॅन्सर होण्याचा धोका वाढतो. अशा परिस्थितीत, या कॅन्सरची तपासणी करण्यासाठी प्रत्येक महिलेने वयाच्या तिशीनंतर वर्षातून एकदा तरी स्क्रीनिंग करणे आवश्यक आहे. ब्रेस्ट कॅन्सर तपासण्यासाठी मॅमोग्राफी करता येते. तर सर्व्हायकल कॅन्सर साठी पॅप स्मीअर ही चाचणी करता येऊ शकते.

डॉक्टरांशी योग्य सल्ला-मसलत करून या चाचण्या करून घ्याव्यात.

थायरॉईइड टेस्ट

वाढत्या वयानुसार महिलांमध्ये थायरॉईडचा धोकाही वाढतो. थायरॉईड वाढलाय किंवा घटलाय हे जाणून घेण्यासाठी थायरॉईड प्रोफाइल चाचणी केली जाऊ शकते. वर्षातून एकदा तरी ही चाचणी करणे हे प्रत्येक महिलेसाठी आवश्यक आहे. वेळीच चाचणी केल्यावर आजाराचे निदान झाले तर हा आजार आटोक्यात आणता येतो आणि गंभीर परिस्थिती उद्भवण्यापासून टाळता येते.

सीबीसी टेस्ट

वयाच्या तिशीनतर प्रत्येक महिलेने सीबीसी टेस्ट करून घेणेही महत्वाचे ठरते. या टेस्टद्वारे प्लेटलेट्स, प्लाझ्मा आणि हिमोग्लोबिन लेव्हल किती आहे, याची माहिती कळू शकते. या टेस्टशिवाय महिलांनी व्हिटॅमिनची चाचणी देखील केली पाहिजे. आजकाल बहुतांश महिलांमध्ये व्हिटॅमिन डी आणि व्हिटॅमिन बी 12 ची खूप कमतरता असल्याचे आढळून येते. त्यामुळे त्या संदर्भातील चाचण्याही वेळीच करून घेतल्या पाहिजेत.

( डिस्क्लेमर : या आर्टिकलमध्ये देण्यात आलेली माहिती व उपाय हे सामान्य ज्ञानावर आधारित आहेत. आमचा याला दुजोरा नाही. ते अवलंबण्यापूर्वी तज्ज्ञांचा सल्ला जरूर घ्यावा.)