पुण्यात खासगी रुग्णालयातही कोरोना लस, किती रुपये दर आकारणार?
पुणे महापालिकेकडून 42 रुग्णालयांमध्ये लसीकरणाची सुविधा उपलब्ध करुन देण्यात आली आहे. (Pune Corona Vaccine Private Hospitals)
पुणे : पुण्यात खासगी रुग्णालयातही कोरोना प्रतिबंधक लस मिळणार आहे. या लसीसाठी रुग्णालयांना 250 रुपये दर आकारण्यास परवानगी देण्यात आली आहे. मात्र यातील 150 रुपये रुग्णालयांना शासनाकडे भरावे लागणार आहेत. पंतप्रधान आयुष्मान भारत जनआरोग्य योजना, महात्मा फुले आरोग्य योजना अशा शासकीय योजनांचे लाभ देणाऱ्या रुग्णालयांमध्येच ही लस उपलब्ध होणार आहे. (Pune Corona Vaccine in Private Hospitals what will be the cost)
केंद्र शासनाने नुकतीच 60 वर्षांपुढील सर्व व्यक्तींना, तर 45 वर्षांपुढील सहव्याधी असलेल्या (को-मोर्बिलिटी) नागरिकांना लस देण्यास परवानगी दिली आहे. त्यानुसार या लसीसाठी रुग्णालयांना 250 रुपये दर आकारण्यास परवानगी मिळाली आहे. यापैकी 150 रुपये शासनाकडे भरावे लागतील, तर शंभर रुपये रुग्णालय प्रशासनाला मिळतील.
42 रुग्णालयांमध्ये लसीकरणाची सुविधा
दरम्यान, पुणे महापालिकेकडून 42 रुग्णालयांमध्ये लसीकरणाची सुविधा उपलब्ध करुन देण्यात आली आहे. प्रत्येक केंद्रावर 100 या प्रमाणे दिवसाला पाच हजार लस मोफत देण्याचे नियोजन करण्याचे काम सुरु आहे, अशी माहिती आरोग्य प्रमुख डॉ. आशिष भारती यांनी दिली.
राज्यात काय स्थिती?
राज्यात प्राधान्यक्रम ठरलेल्या व्यक्तींना कोरोना लसीकरण सुरु आहे. जवळपास 652 केंद्रांच्या माध्यमातून ही प्रक्रिया केली जात आहे. आतापर्यंत एकूण 5 लाखाहून अधिक आरोग्य कर्मचारी आणि फ्रंटलाइन वर्कर्संना कोरोना लस देण्यात आली आहे.
पुण्यात कोरोना रुग्णसंख्येत वाढ
पुण्यात गेल्या काही दिवसांपासून कोरोनाच्या नव्या रुग्णांमध्ये झपाटयाने वाढ होताना दिसत आहे. गेल्या 24 तासात पुणे शहरात कोरोनाचे 739 नवे पॉझिटिव्ह आढळून आले आहेत. तर कालच्या दिवसभरात 6 जणांचा कोरोनामुळे मृत्यू झाला आहे.
गेल्या 24 तासात 412 कोरोनाग्रस्त रुग्ण हे उपचारानंतर बरे झाले असून त्यांना रुग्णालयातून डिस्चार्ज देण्यात आला आहे. सध्या पुणे शहरात कोरोनाचे 260 गंभीर रुग्ण असून त्यांच्यावर अतिदक्षता विभागात उपचार सुरु आहेत.
मुंबईत नगरसेवकांना लसीकरण
राज्यात केंद्र शासनाच्या सूचनेप्रमाणे कोरोना लसीकरण सुरु आहे. प्रत्येक आठवड्याला लसीकरण केंद्रांच्या संख्येत वाढ होत आहे. राज्यात दररोज साधारणपणे 40 ते 45 हजार आरोग्य कर्मचाऱ्यांना लसीकरण केले जात आहे, असेही राजेश टोपे म्हणाले होते. तर 1 मार्चपासून नगरसेवकांना लस देण्यात येईल, अशी माहिती मुंबईच्या महापौर किशोरी पेडणेकर यांनी दिली.
संबंधित बातम्या :
एक मार्चपासून 60 वर्षांवरील सर्व नागरिकांना मोफत कोरोना लस, जावडेकरांची घोषणा
(Pune Corona Vaccine in Private Hospitals what will be the cost)
