Moscow Attack : जमिनीवर झोपून मरण्याच नाटक….मॉस्को हल्ल्यातून बचावलेल्यांचे भयानक अनुभव

रशियाची राजधानी मॉस्कोमध्ये शुक्रवारी एका कॉन्सर्ट हॉलवर भीषण दहशतवादी हल्ला झाला. या हल्ल्यातून बचावलेल्या नागरिकांनी, काळजाचा थरकाप उडवणारे त्यांचे भयानक अनुभव सांगितले आहेत. दहशतवाद्यांनी गोळीबार केला, तेव्हा हॉल लोकांनी खचाखच भरलेला होता. जवळपास 6,200 लोक या हॉलमध्ये उपस्थित होते. रिपोर्टनुसार 133 नागरिकांचा मृत्यू झाला. 140 लोक जखमी झाले आहेत. दहशतवाद्यांनी आधी गोळीबार केला. मग कॉन्सर्ट हॉलला आतमधून आग लावली. त्यामुळे उपस्थित लोकांची एकच पळापळ सुरु झाली. लोक इथे-तिथे पळू लागले.

दहशतवाद्यांनी पळणाऱ्या लोकांवर अंदाधुंद गोळीबार सुरु केला. अनेक पीडितांनी सांगितलं की, आम्हाला हे समजत नव्हतं, नेमक काय होतय. एका महिलने सांगितलं की, तिला असं वाटलं की हा गोळ्यांचा आवाज म्हणजे फटाके फुटतायत. पण जेव्हा तिने लोकांचा आरडाओरडा ऐकला, तेव्हा तिच्या लक्षात आलं की काहीतरी भयानक घडतय.

म्हणून लोक हॉलच्या बाहेर निघू शकले

कॉन्सर्टला गेलेल्या 61 वर्षांच्या ऐलेनाने सांगितलं की, “एक असाही शूरवीर होता, जो त्या परिस्थितीत दुसऱ्याचे प्राण वाचवण्याचे प्रयत्न करत होता. लोक स्टेजच्या पाठिमागच्या बाजूस पळत होते, त्यावेळी एका दहशतवाद्याने त्यांचा रस्ता अडवला” “लोकांमध्ये असलेल्या एका व्यक्तीने हल्लेखोराच्या अंगावर उडी मारली व त्याच्याकडून असॉल्ट रायफल हिसकावून घेतली. त्यामुळे अनेक लोक हॉलच्या बाहेर जाऊ शकले” असं ऐलेनाने सांगितलं.

आगीच्या ज्वाळा वाढल्यानंतर हळूहळू….

आणखी एक पीडित व्यक्ती रुग्णालयात आहे. तिने सांगितलं की, “मी माझ्या मरणाच नाटक केलं म्हणून वाचली. लोकांनी जस जीव वाचवण्यासाठी पळापळ सुरु केली, तस दहशतवाद्यांनी गोळीबार सुरु केला. मी जमिनीवर पडलेली. त्यामुळे मी माझ्या मरणाच नाटक केलं” महिलेने सांगितलं की, “इमारतीला आग लागल्यानंतर श्वास घेण्यासाठी ती दरवाजाजवळ झोपली. आगीच्या ज्वाळा वाढल्यानंतर हळूहळू रांगत तिथून बाहेर पडली”