23 वर्षीय भारतीय वंशाच्या डॉक्टरला ‘मिस इंग्लंड’चा किताब
भारतीय वंशाची 23 वर्षीय डॉक्टर भाषा मुखर्जी हिला 'मिस इंग्लंड'चा किताब मिळाला आहे. 146 इतका भाषाचा असामान्य बुद्ध्यांक आहे
लंडन : भारतीय वंशाच्या तरुणीपुढे इंग्लंडमधील ललनाही फिक्या पडल्या आहेत. भारतीय वंशाची 23 वर्षीय डॉक्टर भाषा मुखर्जी (Bhasha Mukherjee) हिने ‘मिस इंग्लंड’चा (Miss England) मुकूट पटकावला.
इंग्लंडमधील डर्बीत राहणाऱ्या भाषा मुखर्जीकडे वैद्यकीय क्षेत्रातील दोन वेगवेगळ्या पदव्या आहेत. भाषा हिचा आयक्यू 146 असल्यामुळे तिची बुद्धिमत्ता अलौकिक मानली जाते. सर्वसामान्यपणे 40 ते 140 हा बुद्धयांक मानला जातो. भाषाचं आपल्या नावाला साजेसं भाषाकौशल्य आहे. तिला एकूण पाच भाषा अवगत आहेत.
मिस इंग्लंड स्पर्धेच्या निकालानंतर अवघ्या काही तासांतच ती बोस्टनमधील रुग्णालयात ज्युनिअर डॉक्टर म्हणून रुजू होणार होती. ‘सौंदर्यस्पर्धा विजेत्या तरुणींची बुद्धिमत्ता कमी असते, असा सर्वसामान्य समज आहे. मात्र आम्ही स्वतःला सिद्ध करणार आहोत’ असं भाषाने मिस इंग्लंड स्पर्धेपूर्वी सांगितलं होतं.
भाषाचा जन्म भारतातच झाला होता. ती नऊ वर्षांची असताना मुखर्जी कुटुंब यूकेला स्थायिक झालं. युनिवर्सिटी ऑफ नॉटिंगहममधून भाषाने वैद्यकशास्त्र (medical sciences) तसेच औषध आणि शस्त्रक्रिया (medicine and surgery) अशा दोन विषयात बॅचलर्स डिग्री संपादन केली आहे.
‘वैद्यकीय शिक्षण सुरु असतानाच मी सौंदर्यस्पर्धेच्या तयारीला सुरुवात केली. मला मानसिक तयारीसाठी अधिक वेळ गेला. अखेर मी शिक्षण सांभाळत स्पर्धेत भाग घेण्याचा निश्चय केला.’ असं भाषा सांगते.
