युद्ध थांबवण्यासाठी इराणची मोठी अट, सर्वांच्या नजरा अमेरिकेवर, हालचालींना वेग
Iran vs USA : पाकिस्तानच्या इस्लामाबादमध्ये इराण आणि अमेरिका यांच्यात चर्चा होण्याची शक्यता आहे. मात्र हे युद्ध संपवण्यासाठी इराणने एक मोठी अट ठेवली आहे. याबाबत माहिती जाणून घेऊयात.
इराण आणि अमेरिकेदरम्यान सुरू असलेल्या युद्धामुळे संपूर्ण जगात तणाव निर्माण झाला आहे. अनेक देशांमधील परिस्थिती गंभीर बनली आहे. अशातच मध्य पूर्वेतील एक मोठी राजनैतिक घडामोड समोर आली आहे. डोनाल्ड ट्रम्प यांनी 5 दिवस इराणच्या ऊर्जा केंद्रांवर हल्ला न करण्याचा निर्णय घेतला आहे. त्यानंतर आता इराणचे एक उच्चस्तरीय प्रतिनिधीमंडळ पाकिस्तानकडे रवाना होणार आहे. पाकिस्तानच्या इस्लामाबादमध्ये इराण आणि अमेरिका यांच्यात चर्चा होण्याची शक्यता आहे. मात्र हे युद्ध संपवण्यासाठी इराणने एक मोठी अट ठेवली आहे. त्यामुळे आता संपूर्ण जगाचे लक्ष हे अमेरिकेच्या निर्णयाकडे लागले आहे.
युद्ध संपवण्यासाठी इराणची मोठी अट
समोर आलेल्या माहितीनुसार इराणने आता अमेरिकेशी थेट चर्चा करण्यापूर्वी एक अट समोर ठेवली आहे. इराणला डोनाल्ड ट्रम्प यांच्या वक्तव्यांवर आता अजिबात विश्वास उरलेला नाही, अमेरिकेने त्यांची तीन वेळा फसवणूक केल्याचा इराणचा आरोप आहे. हे युद्ध थांबवण्यासाठी पाकिस्तान सौदी अरेबिया आणि इजिप्त मध्यस्थी करत आहेत. या देशांनी ट्रम्प आपले आश्वासन पाळतील याची खात्री द्यावी, अशी मागणी इराणची मागणी आहे. या हमीनंतरच इराणी प्रतिनिधीमंडळ युद्ध समाप्तीच्या चर्चेत सहभागी होणार असल्याची माहिती समोर आली आहे.
लेखी हमीची मागणी
इराणचा असा दावा आहे की, मस्कत, व्हिएन्ना आणि इस्तंबूल येथे झालेल्या मागील चर्चांदरम्यान अमेरिकेने त्यांची तीन वेळा फसवणूक केली. मोजतबा खामेमी यांच्या नेतृत्वाखालील इराणने यावेळी स्पष्ट केले आहे की, थेट चर्चेपूर्वी ठोस आणि लेखी सुरक्षा हमी आवश्यक आहे. IRGC च्या सूत्रांनी दिलेल्या माहितीनुसार, इराणला अमेरिका विश्वासार्ह वाटत नाही. त्यामुळे यावेळी ते थेट चर्चा टाळून पाकिस्तान, इजिप्त आणि कतारसारख्या देशांना संरक्षण कवच म्हणून वापरण्याचा विचार करत आहेत.
चर्चेसाठी इस्लामाबादच का?
इराणने या महत्त्वाच्या चर्चेसाठी पाकिस्तानची निवड केली आहे, कारण त्यांना पाकिस्तानी लष्कर आणि पंतप्रधान शाहबाज शरीफ यांच्यावर मोठा विश्वास आहे. फील्ड मार्शल असीम मुनीर आणि आयएसआय प्रमुखांसोबत होणाऱ्या गुप्त बैठकीत पाकिस्तान, सौदी अरेबिया आणि इजिप्त इराणसाठी आवश्यक संरक्षण कवच बनू शकतात का? हे ठरणार आहे. भविष्यात राजनैतिक अपयश आल्यास या देशांनी सुरक्षा जबाबदारी घ्यावी, अशी इराणची अपेक्षा आहे. त्यामुळे इराणने स्पष्ट केले आहे की, मध्यस्थ देशांनी ठोस आणि लेखी हमी दिल्याशिवाय थेट चर्चा सुरू होणार नाही.
