Donald Trump : डोनाल्ड ट्रम्प यांचा ‘डबल गेम’, एकीकडे इराणसोबत चर्चेचा प्रस्ताव, दुसरीकडे उचललं मोठं पाऊल, तब्बल 10 हजार

इराण आणि इस्रायल-अमेरिकेत सुरू असलेल्या युद्धाला जवळपास 1 महीना होत आला असून आता हा संघर्ष निर्णायक टप्प्यावर पोहोचला आहे. इराणच्या उर्जा प्रकल्पांवर आणि तेल सुविधांवर 10 दिवस हल्ले होणार नाही, अशी मुदत अमेरिकेचे राष्ट्राध्यक्ष डोनाल्ड ट्रम्प यांनी दिली होती. मात्र एकीकडे चर्चेचा प्रस्ताव देतानाच दुसरीकडे ट्रम्प यांनी मध्यपूर्वेत आणखी 10 हजार सैनिक पाठवण्याची तयारी सुरू केली आहे. वॉल स्ट्रीट जर्नलच्या एका अहवालानुसार, पेंटागॉन मध्य-पूर्वेत 10 हजारापर्यंत अतिरिक्त भूदल पाठवण्याची योजना आखत आहे. एकीकडे शांततेसाठी इराणसोबत वाटाघाटी करण्याचा प्रयत्न करणाऱ्या ट्रम्प यांना अधिक लष्करी पर्याय उपलब्ध होणार आहेत. .

गेल्या महिन्यात, म्हणजेच 28 फेब्रुवारी रोजी अमेरिका आणि इस्रायलने संयुक्तपणे इराणवर हल्ला केला, तेव्हा व्यापक वाटाघाटी अजूनही सुरू होत्या. मात्र, या वाटाघाटी मध्यात असतानाच, इराणवर हल्ला झाला आणि सर्वोच्च नेते खामेनी यांच्यासह 40 वरिष्ठ कमांडर मारले गेले. यामुळे नव्या युद्धाला तोंड फुटलं.

अमेरिकेकडून इराणविरुद्ध ड्रोन स्पीडबोट्स तैनात

इराणविरुद्धच्या कारवाईत अमेरिकेने ‘ब्लॅकसी’ कंपनीने बनवलेल्या GARC ड्रोन बोटी तैनात केल्या आहेत, असं पेंटागॉनने प्रथमच कबूल केलं आहे. सध्या सुरू असलेल्या संघर्षात अशा बोटींच्या वापराची अमेरिकेने पुष्टी करण्याची ही पहिलीच वेळ आहे. पाळत ठेवण्यासाठी या बोटींचा वापर प्रामुख्याने केला जात असून गरज पडल्यास त्या हल्ले करण्यासाठीही सक्षम आहेत. गेल्या काही वर्षांपासून अमेरिकन नौदल अशा मानवरहित बोटी बनवण्याचा प्रयत्नात आहे, मात्र त्यांन अनेक समस्यांचा सामना करावा लागला होता.

युक्रेन-रशिया युद्धादरम्यान रशियाच्या ब्लॅक सी फ्लीटचं, नौदलाचं मोठं नुकसान केल्यानंतर अशा ड्रोन बोटींना विशेष महत्त्व प्राप्त झालं. इराणनेही गेल्या महिन्यात आखातातील तेलवाहू जहाजांवर दोन सागरी ड्रोन हल्ले केले होते.

दरम्यान इराणच्या ऊर्जा प्रकल्पांवरील हल्ले थांबवण्याची मुदत 10 दिवसांनी वाढवून ट्रम्प यांनी ती 6 एप्रिलपर्यंत केली होती. मात्र या काळात इराणने अटी मान्य केल्या नाहीत, तर त्यांचे पॉवर प्लांट्स पूर्णपणे उद्ध्वस्त करण्याची धमकी ट्रम्प यांनी दिली.