Iran-Israel War : युद्ध सुरू असतानाच मोठी अपडेट, ट्रम्पवर वाढला दबाव, कोणी पाठवला सीक्रेट मेसेज ?
आखाती मित्रराष्ट्रे (सौदी, यूएई) इराणविरुद्ध लष्करी कारवाई सुरू ठेवण्यासाठी ट्रम्प प्रशासनावर दबाव टाकत आहेत. तेहरानची राजवट बदलण्याची ही ऐतिहासिक संधी असून, महिनाभर हवाई हल्ले होऊनही ती पूर्णपणे खिळखिळी झाली नसल्याचे त्यांचे म्हणणे आहे. 32 दिवसांपासून सुरू असलेल्या या संघर्षात आतापर्यंत 3 हजारांहून अधिक लोकांचा बळी गेला आहे, तरीही युएई सारखे देश भूदल हल्ल्याची मागणी करत आहेत.
इराण वि. इस्रायल-अमेरिका संघर्ष शीगेला पोहोचला असून 32 व्या दिवशीही युद्धाचे ढग कायम आहेत. याचदरम्यान एक मोठी अपडेट समोर आली आहे. सौदी अरेबिया आणि संयुक्त अरब अमिरातीच्या नेतृत्वाखालील अमेरिकेच्या आखाती मित्र राष्ट्रांनी, इराणविरुद्धचे युद्ध सुरू ठेवण्यासाठी राष्ट्राध्यक्ष डोनाल्ड ट्रम्प यांच्यावर दबाव आणण्यास सुरुवात केली आहे. अमेरिकी आणि इस्रायली अधिकाऱ्यांच्या सांगण्यानुसार, आखाती देशांचा असा दावा आहे की महिनाभर हवाई हल्ले होऊनही तेहरानची धार्मिक राजवट अद्याप पूर्णपणे खिळखिळी झालेली नाही. युद्धाच्या सुरुवातीला पुरेशी माहिती न मिळाल्याने हे देश तसंतापले होते, मात्र ( हे युद्ध ) म्हणजेआता तेहरानचे नेतृत्व कायमस्वरूपी मोडून काढण्याची एक ऐतिहासिक संधी अशा दृष्टीने ते त्याकडे पहात आहेत. त्यामुळेच जोपर्यंत इराणी नेतृत्वात मोठा बदल होत नाही, तोपर्यंत लष्करी कारवाया थांबवू नका, असा मेसेज सौदी अरेबिया, संयुक्त अरब अमिरात, कुवेत आणि बहरीन यांनी पाठवल्याची माहिती समोर आली आहे.
युद्ध अजून सुरू ठेवायचं की तोडगा काढायचा या द्विधा मनःस्थितीत ट्रम्प स्वतः आहेत, मात्र त्यावेळीच ही मागणी आली आहे. गेल्या 32 दिवसांपासून सुरू असलेल्या या युद्धात आतापर्यंत 3 हजारांहून हून अधिक लोक मारले गेले आहेत.
ट्रम्प यांचं म्हणणं काय ?
रविवारी संध्याकाळी एअर फोर्स वनमधून ट्रम्प यांनी पत्रकारांशी संवाद साधला होता. “सौदी अरेबिया जोरदार प्रत्युत्तर देत आहे. कतार प्रत्युत्तर देतंय, यूएई पलटवार करतोय. कुवेत , बहरीनही प्रत्युत्तर देत आहे ” असं त्यांनी सांगितलं.
आखाती देशांमध्ये अमेरिकी सैन्य आणि तळ आहेत, जिथून अमेरिकेने इराणवर हल्ले केले आहेत, मात्र या देशांनी स्वतः या हल्ल्यांमध्ये सहभाग घेतलेला नाही. आखाती मित्रराष्ट्र ही कमी-अधिक प्रमाणात युद्धाला पाठिंबा देतात. मात्र, प्रादेशिक नेते आता अमेरिकेच्या प्रयत्नांना मोठ्या प्रमाणावर पाठिंबा देत आहेत. एका आखाती राजदूताने सांगितले की या मुद्द्यावर काही मतभेद आहेत, आणि सौदी अरेबिया व संयुक्त अरब अमिराती तेहरानवर वाढीव लष्करी दबाव आणण्यासाठी पुढाकार घेत आहेत असं वृत्त एपीने दिलं होतं.
संयुक्त अरब अमिरात (UAE) हा आखाती देशांमध्ये कदाचित सर्वात आक्रमक देश म्हणून उदयास आला आहे आणि तो ट्रम्प यांच्यावर जमिनीवरील आक्रमणाचा आदेश देण्यासाठी दबाव आणत आहे, असंही राजदूतंनी नमूद केलं. कुवेत आणि बहरीन देखील या पर्यायाला पाठिंबा देत आहेत. इराणद्वारे डागण्यात आलेल्या 2300 हून अधिक क्षेपणास्त्र आणि ड्रोन हल्ल्यांचा सामना करणाऱ्या UAE मध्ये, युद्ध लांबत चालल्याने वाढता संताप दिसून येत आहे. या हल्ल्यांमुळे मध्यपूर्वेतील व्यापार आणि पर्यटनासाठी एक सुरक्षित आणि समृद्ध केंद्र म्हणून असलेल्या त्याच्या प्रतिमेला डाग लागण्याचा धोका आहे.
