VIDEO : मॉस्कोत विमानाला भीषण आग, 41 प्रवासी जळून खाक

मॉस्को (रशिया) : रशियातील मॉस्को येथे विमानाच्या मागील बाजूस आग लागल्याने इमर्जन्सी लँडिंग करावी लागली. मात्र, विमानाच्या मागील बाजूस लागलेल्या आगीने मोठी जीवितहानी झाली आहे. आतापर्यंत मिळालेल्या माहितीनुसार, रविवारी (5 मे) घडलेल्या या दुर्घटनेत 41 प्रवासी मृत्यूमुखी पडले आहेत आणि जवळपास 13 प्रवासी जखमी झाले आहेत. सुखोई सुपरजेट 100 एअरक्राफ्ट असे दुर्घटनाग्रस्त विमानाचे नाव आहे.

मॉस्कोतील या विमान दुर्घटनेचे व्हिडीओ सोशल मीडियावर सुद्धा व्हायरल झाले आहेत. त्यानुसार, हे विमान आग लागल्यानंतरही रन वेवर काही अंतर पुढे जात होतं. आग इतकी भडकली की, आतील प्रवाशांची राखरांगोळी झाली. 41 प्रवाशांचा जागीच मृत्यू झाला. दुर्घटनाग्रस्त विमानात एकूण 78 प्रवासी होते.

या दुर्घटनेची चौकशी करणाऱ्या रशियन समितीच्या माहितीनुसार, “दुर्घटनाग्रस्त विमानात क्रू मेंबर्ससह 78 जण प्रवासी होते. आतापर्यंत मिळालेल्या माहितीनुसार 38 जणांना वाचवण्यात यश आलं आहे. 11 जण जखमी आहेत.”

विमान दुर्घटनेतील गंभीर जखमींना जवळील हॉस्पिटलमध्ये उपचारासाठी दाखल करण्यात आले आहे. मात्र, त्यातील तिघांचा प्रकृती अत्यंत गंभीर आहे.

रशियाचे राष्ट्रपती व्लादिमीर पुतीन यांनी मृतांना आदरांजली वाहिली असून, जखमींची विचारपूसही केली. विमान दुर्घटनेच्या चौकशीसाठी तातडीने समिती नेमण्यात आली आहे.

सेव्हिएत युगाचा अंत झाल्यानंतरचं पहिलं प्रवाशी एअरक्राफ्ट म्हणून ‘सुखोई सुपरजेट 100’ म्हणून ओळखलं जातं. या एअरक्राफ्टला परदेशात कुणीच खरेदी करत नव्हतं. या एअरक्राफ्टच्या सुरक्षेवर अनेकांकडून प्रश्न उपस्थित केले जात होते. 2012 मध्ये डेमो फ्लाईट दरम्यान इंडोनिशियामध्ये सुखोई सुपरजेट 100 एका डोंगरावर आदळला होता, त्यावेळी 45 प्रवाशांचा मृत्यू झाला होता.

पाहा व्हिडीओ :