रशिया आणि युक्रेनमध्ये शस्त्रसंधी होणार का? जाणून घ्या

रशिया आणि युक्रेन यांच्यातील युद्ध संपणार का? अशी चर्चा सध्या रंगत आहे. याचं कारणही तसंच आहे. कारण, अमेरिकेचे राष्ट्राध्यक्ष डोनाल्ड ट्रम्प आणि पुतिन यांची भेट होणार आहे. आता ही भेट कुठे होणार, दोन्ही नेत्यांमध्ये चर्चेदरम्यान नेमकं कोणत्या विषयावर चर्चा होण्याची शक्यता आहे, युद्ध थांबणार का, याविषयीची माहिती पुढे जाणून घेऊया.

रशिया आणि युक्रेन यांच्यात सुरू असलेले युद्ध थांबविण्यासाठी अमेरिकेचे राष्ट्राध्यक्ष डोनाल्ड ट्रम्प पुढील आठवड्यात रशियाचे राष्ट्राध्यक्ष व्लादिमीर पुतिन यांची भेट घेणार आहेत. रशिया-युक्रेन संघर्षावर चर्चा करण्यासाठी दोन्ही नेत्यांची 15 ऑगस्ट रोजी भेट होणार असल्याचे ट्रम्प यांनी सोशल मीडिया पोस्टमध्ये म्हटले आहे.

अलास्का येथे या दोघांची बैठक होणार आहे. अमेरिकेचे राष्ट्राध्यक्ष आणि रशियाचे राष्ट्राध्यक्ष व्लादिमीर पुतिन यांच्यातील बहुप्रतीक्षित बैठक येत्या शुक्रवारी, 15 ऑगस्ट 2025 रोजी अलास्का या महान राज्यात होणार आहे, असे ट्रम्प यांनी ट्रुथ सोशलवर लिहिले आहे.

क्रेमलिनचे सहकारी युरी उशाकोव्ह यांनी या भेटीला दुजोरा दिल्याचे वृत्त रशियन वृत्तसंस्था तासने दिले आहे. युक्रेनचे राष्ट्राध्यक्ष व्होलोदिमीर झेलेन्स्की यांच्यासह दोन्ही देश साडेतीन वर्षांपासून सुरू असलेला संघर्ष संपुष्टात आणण्यासाठी शस्त्रसंधी कराराच्या जवळ असल्याचे ट्रम्प यांनी सोशल मीडियावर जाहीर करण्यापूर्वी म्हटले होते. त्यासाठी युक्रेनला आपला मोठा भूभाग द्यावा लागू शकतो, असे संकेत त्यांनी दिले.

युक्रेनला आपली जमीन सोडावी लागू शकते

शुक्रवारी व्हाईट हाऊसमध्ये पत्रकारांशी बोलताना ते म्हणाले की, दोन्ही देशांच्या हितासाठी काही क्षेत्राची देवाणघेवाण केली जाईल. शुक्रवारी संध्याकाळी युक्रेनच्या राष्ट्राध्यक्षांनीही देशाला संबोधित केले आणि रशियावर दबाव ठेवल्यास शस्त्रसंधी शक्य असल्याचे सांगितले. आपली टीम सतत अमेरिकेच्या संपर्कात असल्याचे त्यांनी सांगितले.

दुसऱ्या कार्यकाळातील पुतिन यांच्याशी ट्रम्प यांची पहिली भेट

जानेवारी 2025 मध्ये पुतिन यांनी आपला दुसरा कार्यकाळ सुरू केल्यानंतर ट्रम्प यांची त्यांच्याशी ही पहिलीच अधिकृत भेट आहे. जून 2021 नंतर अमेरिका आणि रशियाच्या राष्ट्राध्यक्षांची ही पहिलीच औपचारिक बैठक असेल.

2021 मध्ये बायडन यांनी स्वित्झर्लंडमध्ये पुतिन यांची भेट घेतली होती. पुतीन यांचा अलास्का दौरा गेल्या दशकभरातील त्यांचा पहिलाच अमेरिका दौरा असेल. सप्टेंबर 2015 मध्ये न्यूयॉर्कमध्ये संयुक्त राष्ट्रांच्या आमसभेच्या निमित्ताने ते अमेरिकेला गेले होते, तेथे त्यांनी तत्कालीन राष्ट्राध्यक्ष बराक ओबामा यांची भेट घेतली होती. मात्र, त्यांच्या चमूने संयुक्त अरब अमिरातीसारख्या चर्चेसाठी तिसऱ्या स्थानाला प्राधान्य दिले होते. परंतु ट्रम्प प्रशासनाने सुरक्षेच्या कारणास्तव देशांतर्गत जागेचा आग्रह धरल्याचे दिसून येत आहे.