145 किमी वेग असणाऱ्या चक्रि‍वादळाचा कहर, निसर्ग कोपल्याने लाखो लोक संकटात; अलर्ट जारी

भारताच्या शेजारील देश चीनवर मोठं संकट आलं आहे. नोल चक्रिवादळ रविवारी सकाळी दक्षिण चीनच्या किनारपट्टीवर धडकले. या वादळामुळे जोरदार वारे वाहत असून मुसळधार पावसाला सरुवात झाली आहे. यामुळे अनेक ठिकाणी पूरस्थिती निर्माण झाली असल्याने ग्वांगडोंग प्रांतातील लाखो नागरिकांना सुरक्षित ठिकाणी हलवण्यात आले आहे. संपूर्ण परिसरात हाय अलर्ट जारी करण्यात आला असून अनेक विमाने रद्द करण्यात आली आहेत. याबाबत सविस्तर माहिती जाणून घेऊयात.

चीनच्या राष्ट्रीय हवामान केंद्राने दिलेल्या माहितीनुसार, रविवारी स्थानिक वेळेनुसार पहाटे सुमारे 3:50 वाजता नोल चक्रिवादळ दक्षिण ग्वांगडोंग प्रांतातील हुइझोउ शहरातील हुइडोंग काउंटीच्या किनारपट्टीवर धडकले. हाँगकाँग वेधशाळेने सांगितले की, नोल चक्रि‍वादळाच्या केंद्राजवळ ताशी 145 किलोमीटर वेगाने वारे वाहत होते. हे वादळ रविवारी ग्वांगडोंगच्या अंतर्गत भागाकडे सरकत होते आणि हळूहळू कमकुवत होत होते. मात्र, या वादळाच्या प्रभावामुळे अनेक भागांत जोरदार वाऱ्यासह मुसळधार पावसाने कहर केला आहे.

रेल्वे सेवा रद्द

सरकारी माध्यमांनी दिलेल्या माहितीनुसार ग्वांगडोंग प्रांतातून 3 लाख 40 हजारांहून अधिक नागरिकांना सुरक्षित स्थळी हलवण्यात आले आहे. तसेच या प्रांतातील अनेक रेल्वे सेवा रद्द करण्यात आल्या आहेत. चीनच्या राष्ट्रीय हवामान विभागाने आठवड्याच्या शेवटी दक्षिण ग्वांगडोंग आणि आग्नेय फुजियान प्रांतातील काही भागांमध्ये मुसळधार पाऊस आणि जोरदार वाऱ्याचा इशारा दिला होता. त्याचाच कहर पहायला मिळाला.

तैवानलाही पावसाने झोडपलं

हाँगकाँग आणि तैवानलाही या वादळाचा तडाखा बसला. तैवान हवामान विभागाने सांगितले की, चक्रि‍वादळामुळे दक्षिण आणि पूर्व तैवानच्या काही भागांत मुसळधार पाऊस कोसळला. हे वादळ तैवानच्या दक्षिणेकडील समुद्रातून पुढे सरकत असल्याचे आता समोर आले आहे.

दक्षिण चीनला वादळाचा तडाखा

या महिन्याच्या सुरुवातीला बावी चक्रि‍वादळामुळे पूर्व चीनमध्ये मुसळधार पाऊस आणि वादळी वाऱ्यांनी हाहाकार माजवला होता. त्यावेळी 20 लाखांहून अधिक नागरिकांचे स्थलांतर करावे लागले होते. हे वादळ 11 जुलै रोजी किनारपट्टीवर धडकले होते. यापूर्वी 3 जुलै रोजी मेसाक चक्रि‍वादळानेही दक्षिण चीनच्या किनारपट्टीवर धडक दिली होती, यात मोठे नुकसान झाले होते.