नेपाळच्या राजेशाही समर्थक रॅलीत CM योगींच्या पोस्टर्सनं वादंग, केपी ओलींवर आरोप
नेपाळचे माजी राजे ज्ञानेंद्र शाह यांच्या स्वागतासाठी आयोजित राजेशाही समर्थक रॅलीत उत्तर प्रदेशचे मुख्यमंत्री योगी आदित्यनाथ यांचे पोस्टर्स फडकविण्यात आले. जनआंदोलनानंतर 2008 मध्ये नेपाळमध्ये संपुष्टात आलेली राजेशाही पुन्हा सुरू करण्याची मागणी होत आहे. रॅलीत मुख्यमंत्री योगींचे पोस्टर फडकावल्यानंतर गदारोळ माजला आहे.
नेपाळची राजधानी काठमांडूमध्ये माजी राजा ज्ञानेंद्र शहा यांच्या स्वागतासाठी आयोजित राजेशाही समर्थक रॅलीत उत्तर प्रदेशचे मुख्यमंत्री योगी आदित्यनाथ यांचे फोटो दाखवण्यात आल्याने वाद निर्माण झाला आहे. देशाच्या विविध भागांतील धार्मिक स्थळांना भेटी दिल्यानंतर पोखरा येथून सिमरिक एअरच्या हेलिकॉप्टरने त्रिभुवन आंतरराष्ट्रीय विमानतळावर उतरताच राजेशाही समर्थक राष्ट्रीय प्रजातंत्र पक्षाचे (आरपीपी) नेते आणि कार्यकर्त्यांसह शेकडो समर्थकांनी त्यांच्या बाजूने घोषणा देण्यास सुरुवात केली.
राजेशाही पुन्हा प्रस्थापित करण्याची मागणी
नेपाळमध्ये राजेशाहीच्या पुनर्स्थापनेसाठी पाठिंबा दर्शविणे हा या रॅलीचा उद्देश होता. विमानतळाबाहेर रस्त्याच्या दुतर्फा ज्ञानेंद्र यांचे फोटो आणि राष्ट्रध्वज घेऊन मोटारसायकलवरून शेकडो समर्थकांनी त्यांचे स्वागत केले. काही समर्थकांनी ज्ञानेंद्र यांच्या फोटोसोबत योगी आदित्यनाथ यांचा फोटोही दाखवला.
मात्र, ज्ञानेंद्र यांच्या छायाचित्रासह भाजप नेते योगी आदित्यनाथ यांचे छायाचित्र दाखवण्यात आल्याने इंटरनेट माध्यमांवर विविध राजकीय पक्षांसह सर्वसामान्य जनतेकडून जोरदार टीका करण्यात आली. या टीकेनंतर आरपीपीचे प्रवक्ते ज्ञानेंद्र शाही यांनी आदित्यनाथ यांचा फोटो लावणे हा केपी ओली यांच्या नेतृत्वाखालील सरकारने राजेशाहीसमर्थक चळवळीला बदनाम करण्याचा जाणीवपूर्वक केलेला प्रयत्न असल्याचा आरोप केला.
केपी ओली म्हणाले की, ‘हा हल्ला’
ओली सरकार घुसखोरीच्या माध्यमातून हे पाऊल उचलत असल्याचा आरोप त्यांनी केला. पंतप्रधान केपी ओली यांचे मुख्य सल्लागार बिष्णु रिमाल यांच्या सूचनेनुसार आणि ओली यांच्या सल्ल्यानुसार रॅलीत योगी आदित्यनाथ यांचा फोटो लावण्यात आल्याचा दावा त्यांनी केला आहे. रिमल यांनी मात्र हे आरोप फेटाळून लावले आहेत.
चुकीच्या पद्धतीने जबाबदार पदांवर पोहोचलेल्या अपात्र व्यक्तींनी चुकीच्या माहितीद्वारे निर्माण केलेला हा भ्रम होता, असे त्यांनी आपल्या पोस्टमध्ये म्हटले आहे. दरम्यान, योगी आदित्यनाथ यांचे नाव न घेता पंतप्रधान ओली यांनी सोमवारी काठमांडू येथील एका कार्यक्रमात सांगितले की, आम्ही आमच्या रॅलींमध्ये परदेशी नेत्यांचे फोटो वापरत नाही. ज्ञानेंद्र यांनी जानेवारी महिन्यात उत्तर प्रदेशच्या दौऱ्यात आदित्यनाथ यांची भेट घेतली होती.
2008 मध्ये झालेल्या जनआंदोलनानंतर रद्द झालेली राजेशाही पुन्हा सुरू करण्याच्या मागणीसाठी माजी राजाचे समर्थक गेल्या काही दिवसांपासून काठमांडू आणि पोखरासह देशाच्या विविध भागात रॅली काढत आहेत.
नेपाळचे माजी पंतप्रधान आणि सीपीएन-युनिफाइड सोशलिस्टचे अध्यक्ष माधवकुमार नेपाळ यांनी शुक्रवारी सांगितले की, देशात पुन्हा राजेशाही प्रस्थापित होण्याची शक्यता नाही. राजेशाहीही आता भूतकाळाची गोष्ट झाली आहे, त्यामुळे त्याची पुन्हा स्थापना होण्याची शक्यता नाही, असे ते म्हणाले. देशाची सेवा करायची असेल तर निवडणूक लढवावी आणि पंतप्रधान व्हावे, असा सल्ला त्यांनी माजी राजा ज्ञानेंद्र यांना दिला.
