अनंत अंबानींकडे हिऱ्यांनी मढवलेलं 12 कोटींचं ‘शिव’ घड्याळ, आध्यात्माशी का आहे खास कनेक्शन?

देशातील प्रसिद्ध उद्योगपती मुकेश अंबानी यांचे कुटुंब त्यांच्या आलिशान आणि वेगळ्या लाइफस्टाइलसाठी नेहमीच सोशल मीडियावर आणि देशभरात चर्चेत असते. अलीकडेच त्यांचा धाकटा मुलगा अनंत अंबानी याने घातलेल्या एका खास घड्याळाने संपूर्ण जगाचे लक्ष वेधून घेतले आहे.

‘ओपेरा गॉडफादर बॅगेट शिवा’ नावाचे हे घड्याळ केवळ लक्झरी आयटम नसून कला, तंत्रज्ञान आणि अध्यात्म यांचा अनोखा संगम मानले जात आहे. हे खास घड्याळ जगप्रसिद्ध Jacob & Co. या कंपनीने तयार केले असून त्याची किंमत तब्बल 12 कोटी रुपयांच्या आसपास असल्याचे सांगितले जाते.

घड्याळात हजारहून अधिक हिरे

या घड्याळाचा बाह्य भाग 18 कॅरेट रोज गोल्डपासून बनवण्यात आला आहे. यामध्ये 300 पेक्षा अधिक बॅगेट कट हिरे जडवण्यात आले आहेत तर एकूणच या घड्याळात हजारहून अधिक हिरे वापरण्यात आले आहेत. त्यामुळे हे घड्याळ म्हणजे केवळ वेळ दाखवणारे साधन नसून एक उत्कृष्ट कलाकृती म्हणूनही ओळखले जाते.

या घड्याळाचे सर्वात मोठे आकर्षण म्हणजे त्याच्या मध्यभागी ध्यानमुद्रेत विराजमान असलेली भगवान शिव यांची मूर्ती. त्याचबरोबर ‘ॐ’ हे पवित्र चिन्हही कोरलेले आहे. शिवाची ध्यानमुद्रा ही शांती, एकाग्रता आणि अंतर्गत शक्तीचे प्रतीक मानली जाते. या रूपातून हे दर्शवले जाते की खरे सुख बाह्य जगात नसून आपल्या अंतर्मनात आहे.

120 सुरांचे संगीत यंत्र

योग आणि ध्यान साधनेसाठी शिवाचे हे रूप आदर्श मानले जाते, कारण ते अस्थिर मनाला स्थिर करण्याची प्रेरणा देते आणि ब्रह्मांडीय ऊर्जेशी जोडण्याचा संदेश देते. सनातन धर्मात ‘ॐ’ हे सर्वोच्च आणि पवित्र ध्वनी मानले जाते. याला ‘प्रणव मंत्र’ असेही संबोधले जाते. धार्मिक मान्यतेनुसार, ॐ ही संपूर्ण सृष्टीची मूलभूत ध्वनी असून ती परमेश्वराचे प्रतीक आहे. ॐ चा जप केल्याने मनाला शांती मिळते, सकारात्मक ऊर्जा वाढते, आरोग्य सुधारते आणि मानसिक स्थैर्य मिळते असे मानले जाते.

विशेष म्हणजे, हे एक म्युझिकल घड्याळ देखील आहे. यामध्ये 120 सुरांचे संगीत यंत्र बसवण्यात आले असून एका बटणावर The Godfather या प्रसिद्ध चित्रपटातील गाणे वाजते. गाणे सुरू असताना घड्याळातील आतील यंत्रणा हलताना दिसते, जे पाहणे ही एक वेगळीच अनुभूती ठरते.