हे आहे करोडपती शेतकऱ्यांचं गाव, नापीक जमिनीतून करतात कोट्यवधींची कमाई, श्रीमंती पाहून व्हाल थक्क

एकेकाळी नापीक आणि पाण्याच्या कमतरतेमुळे त्रस्त असलेली जमीन आज शेतकऱ्यांसाठी लाखो-कोट्यवधींच्या उत्पन्नाचा स्रोत बनली आहे. राजस्थानमधील गुढ़ा खुमावतन हे गाव आधुनिक शेती तंत्रज्ञानामुळे चर्चेत आले आहे. जयपूरजवळील जोबनेर तहसीलमध्ये असलेल्या या गावाला ‘मिनी इस्रायल’ म्हणून ओळखले जाते. येथे पॉलीहाऊसच्या मदतीने शेती करून अनेक शेतकरी चांगले उत्पन्न मिळवत असल्याचे सांगितले जाते.

या गावातील शेतकरी खेमाराम चौधरी यांनी 2012 मध्ये राजस्थान सरकारच्या माध्यमातून इस्रायलला भेट दिली होती. तेथे त्यांनी पॉलीहाऊसमधील संरक्षित शेतीचे तंत्रज्ञान शिकून घेतले आणि गावात परतल्यानंतर त्याचा वापर सुरू केला. सुरुवातीला एका पॉलीहाऊसमधून केलेल्या प्रयोगाला चांगले यश मिळाले. अवघ्या तीन महिन्यांत शिमला मिरचीच्या पिकातून १३ लाख रुपयांचे उत्पन्न मिळाल्याचे त्यांनी सांगितले.

त्यानंतर गावातील इतर शेतकऱ्यांनीही या तंत्रज्ञानाचा स्वीकार करण्यास सुरुवात केली. आज परिसरात अनेक पॉलीहाऊस उभारण्यात आले असून, शेतकरी पारंपरिक शेतीसोबत आधुनिक पद्धतींचा वापर करत आहेत.

पाण्याची कमतरता असूनही शेतीत यश

या भागात पाण्याची मोठी समस्या आहे. भूगर्भातील पाणी खोलवर असून ते खारट असल्यामुळे शेतीसाठी त्याचा वापर करणे कठीण जाते. यावर उपाय म्हणून शेतकरी पावसाचे पाणी शेततळ्यांमध्ये साठवतात आणि ठिबक सिंचनाच्या माध्यमातून पिकांना पाणी देतात.

या पद्धतीमुळे पाण्याचा काटकसरीने वापर करता येतो. पॉलीहाऊसमध्ये नियंत्रित वातावरणात शेती करता येत असल्याने प्रतिकूल हवामानाचा परिणामही कमी करण्यास मदत होते.

शिमला मिरची, काकडीच्या शेतीतून मोठा नफा

पॉलीहाऊसमध्ये शिमला मिरची, काकडी आणि इतर भाजीपाला पिकांची लागवड केली जाते. हंगामाबाहेरही भाजीपाला पिकवून बाजारात विक्री करण्याची संधी शेतकऱ्यांना मिळते. त्यामुळे योग्य बाजारभाव मिळाल्यास उत्पन्नात वाढ होऊ शकते.

गावातील शेतकरी बाबूलाल यांच्याकडे नऊ पॉलीहाऊस असल्याचे सांगितले जाते. शेतीतून वर्षाला सुमारे एक कोटी रुपयांचे उत्पन्न मिळत असून, त्यापैकी 40 ते 50 लाख रुपयांची बचत होत असल्याचा त्यांचा दावा आहे. त्यांनी शेतीच्या उत्पन्नातून आलिशान फार्महाऊसही उभारले आहे.

उत्पन्नाच्या जोरावर घर आणि गाड्या

पॉलीहाऊस उभारण्यासाठी सरकारी अनुदानाची मदत मिळत असल्याने या पद्धतीकडे शेतकऱ्यांचा कल वाढत आहे. गावातील अनेक शेतकरी शेतीतून मिळणाऱ्या उत्पन्नाच्या जोरावर चांगली घरे आणि महागड्या गाड्या खरेदी करत असल्याचे सांगितले जाते.