कर्नाटकात कोरोना संशयित रुग्णाचा मृत्यू : पीटीआय
भारतात 'कोरोना'बाधितांची संख्या 60 वर पोहचली आहे. यामध्ये 36 भारतीय नागरिकांचा समावेश आहे. Corona Suspect Death in India
Corona Virus Update in India : कर्नाटकात ‘कोरोना’ संशयित रुग्णाचा मृत्यू झाल्याचं समोर आलं आहे. कलबुर्गीमध्ये 76 वर्षीय रुग्णाचा मृत्यू झाल्याची माहिती कर्नाटक सरकारने दिली आहे. संबंधित रुग्णाला ‘कोरोना विषाणू’ची बाधा झाल्याचं निष्पन्न झाल्यास भारतात ‘कोरोना’ने घेतलेला हा पहिला बळी ठरेल. (Corona Suspect Death in India)
मृत्युमुखी पडलेल्या वृद्ध व्यक्तीचे आरोग्य अहवाल अद्याप आलेले नसल्याचं सांगत कर्नाटकातील आरोग्य आयुक्तांनी हा ‘कोरोना बळी’ असल्याच्या वृत्ताचा इन्कार केला आहे. ‘पीटीआय’ वृत्तसंस्थेनेही संबंधित व्यक्ती ‘कोरोना’ संशयित असल्याचा उल्लेख केला आहे.
जगभरात धुमाकूळ घालणाऱ्या ‘कोरोना’ व्हायरसने (Covid-19) भारतातही हातपाय पसरण्यास सुरुवात केली आहे. भारतात ‘कोरोना’बाधितांची संख्या 60 वर पोहचली आहे. यामध्ये 36 भारतीय नागरिकांचा समावेश आहे. तर 16 कोरोनाग्रस्त हे भारत दौऱ्यावर असलेले इटालियन नागरिक आहेत.
A 76-year-old man suspected to be infected with coronavirus dies in Karnataka’s Kalaburagi: Government
— Press Trust of India (@PTI_News) March 11, 2020
दुबईहून आलेल्या पुणेकर दाम्पत्याला कोरोना विषाणूची लागण झाल्यानंतर त्यांच्या संपर्कात आलेल्या आणखी तिघांनाही संसर्ग झाल्याचं उघड झालं. यामध्ये दाम्पत्याचीच कन्या, नातेवाईक आणि संबंधित कुटुंबाला मुंबईहून पुण्याहून घेऊन येणाऱ्या ओला कॅब चालकाचा समावेश आहे.
कोरोनाबाधित सर्व रुग्णांना पुण्यातील नायडू रुग्णालयात दाखल करण्यात आलं आहे. त्यांच्यावर विलगीकरण कक्षात तातडीने उपचार सुरु करण्यात आले आहेत. सर्वांची प्रकृती स्थिर असून सौम्य स्वरुपाचा कोरोना असल्याची माहिती आहे.
टिप्स : कोरोना व्हायरसचा प्रादुर्भाव रोखण्यासाठी 10 सोपे उपाय
पिंपरी चिंचवडमध्ये एका, तर नागपूरमध्ये तिघा जणांना ‘कोरोना’ची लागण झाल्याचा संशय आहे. कोरोना विषाणूचा संसर्ग झालेल्या पुण्यातील कुटुंबासोबत विमानातून प्रवास केलेल्या मुंबईतील सहा प्रवाशांची कस्तुरबा रुग्णालयात चाचणी करण्यात आली, संध्याकाळपर्यंत त्यांचा अहवाल येणार आहे. त्यांच्यासोबत ‘ग्रुप टूर’ आणि विमानात असलेल्या ठाणे, रायगड, बीडच्या प्रवाशांचीही तपासणी करण्यात आली.
दरम्यान, मंगळवार 10 मार्च रोजी केरळात कोरोनाच्या आणखी आठ रुग्णांची भर पडली. भारतीय वंशाच्या एका नागरिकाला ब्रिटनमध्ये ‘कोरोना’ला बळी पडावे लागले. (Corona Suspect Death in India)