रियादहून दिल्लीला निघालेल्या विमानात प्रवाशाला हृदयविकाराचा झटका, कराचीत इमर्जन्सी लँडिंग

कराची : भारत-पाकिस्तान सीमेवर सध्या तणावाचं वातारण आहे. मात्र, या तणावाचा विचार न करता पाकिस्तानने आज भारतीय एअरलाईन्सच्या गो-एअर फ्लाइटला इमर्जन्सी लँडिंगसाठी परवानगी दिली. विमानामधील एका प्रवाशाला हृदयविकाराचा तीव्र झटका आला. त्यासाठी ही इमर्जन्सी लँडिंग आवश्यक होती. पाकिस्तानने मानवता धर्म जपत कराची विमानतळावर इमर्जन्सी लँडिंगसाठी परवानगी दिली. मात्र, तरीही प्रवाशाच्या जीव वाचवण्यात यश आलं नाही (Emergency landing of Indian airlines go air flight at Karachi).

सौदी अरेबियाच्या रियाद येथून दिल्लीच्या दिशेला हे विमान निघालं होतं. मात्र, अचानक वाटेत एका 30 वर्षीय प्रवाशाला हृदय विकाराचा तीव्र झटका आला. प्रवाशी विमानातच बेशुद्ध पडला. प्रवाशाची प्रकृती बिघडल्याने त्यााला तातडीने उपचाराची गरज होती. या दरम्यान, पाकिस्तानच्या प्रशासनाने कराची विमानतळावर विमानाला इमर्जन्सी लँडिंगसाठी परवानगी दिली.

कराची विमानतळावर डॉक्टरांनी प्रवाशाला तपासले. मात्र, तोपर्यंत उशिर झाला होता. विमानतळावरील डॉक्टरांनी प्रवाशाला मृत घोषित केले. मृत प्रवासी उत्तर प्रदेशच्या बरेली येथीस रहिवासी आहेत. प्रवाशाला मृत घोषित केल्यानंतर विमान कराचीहून दिल्लीच्या दिशेला रवाना झालं (Emergency landing of Indian airlines go air flight at Karachi).

दरम्यान, याआधी 8 नोव्हेंबर रोजी रियाद येथून बंगळुरुला जाणाऱ्या विमानाची मुंबई विमानतळावर इमर्जन्सी लँडिंग घेण्यात आली होती. काही तांत्रिक कारणांमुळे ही लँडिंग घेण्यात आली होती. मात्र, त्यावेळी कोणत्याही प्रकारचं नुकसान झालं नव्हतं.

हेही वाचा : योगी सरकारचा मोठा निर्णय, 23 नोव्हेंबरपासून शाळा, कॉलेज सुरु, गाईडलाईन्स जारी