राज्यातील कोरोना चाचणीच्या दरात कपात, नवी किंमत किती?

मुंबई : राज्यात कोरोना संक्रमनाचा वेग पाहता जास्तीत जास्त चाचण्या होणं जरुरीचं आहे. त्यामुळे राज्य सरकारने आरटीपीसीआर चाचणीचा दर 1 हजार 200 रुपये इतका केला आहे. सध्या आरटीपीसीआर चाचणीचा दर 2 हजार 200 रुपये इतका होता. त्याआधी तोच दर 4 हजार 500 रुपये इतका होता. मात्र, जून महिन्यात सरकारने कोरोना चाचणीचे दर निम्म्याने कमी केले होते (Maharashtra Government reduce corona test rates).

राज्यात खासगी लॅबमध्ये कोरोना चाचणीसाठी अव्वाच्या सव्वा पैसे आकारले जातात, अशा अनेक तक्रारी सरकारकडे दाखल करण्यात आल्या होत्या. त्यामुळे खासगी लॅबमध्ये कोरोना चाचणीचे दर ठरवण्यासाठी राज्य सरकारने समिती गठीत केली होती. या समितीने खासगी लॅबशी चर्चा करुन चाचण्यांचा दर कमी करण्याचा अहवाल सरकारपुढे मांडला होता. त्यानंतर राज्यात कोरोना चाचणीचे दर 2 हजार 200 रुपये इतके झाले होते. त्यानंतर लॉकडाऊनचा विचार करता समितीने कोरोना चाचणीचे दर आणखी कमी करण्याचा अहवाल सरकारपुढे मांडला होता. या अहवालाला राज्य सरकारने मान्यता दिली आहे.

राज्य सरकारने गठीत केलेल्या समितीने गेल्या पाच महिन्यांपासून सुरु असलेल्या लॉकडाऊनचा विचार करुन कोरोना चाचणींचा दर आणखी कमी करण्याचा अहवाल राज्य सरकारपुढे मांडला. विशेष म्हणजे हा अहवाल सरकारपुढे सादर करण्याआधी समितीने खासगी प्रयोगशाळांशी चर्चादेखील केली आहे. या अहवालाला राज्य सरकारने सोमवारी (7 सप्टेंबर) मान्यता दिली (Maharashtra Government reduce corona test rates).

आरटीपीसीआर टेस्टचा दर निश्चित करणाऱ्या समितीच्या अहवालानुसार यापुढे खासगी लॅबमध्ये महाराष्ट्रात प्रति व्यक्ती कोरोना चाचणीसाठी 1200 रुपये आकारले जाणार आहेत. तसेच एखाद्या रुग्णाच्या घरी जाऊन जर टेस्ट करायची असेल तर पूर्वी 2 हजार 800 रुपये आकारले जात होते. मात्र आता त्यासाठी फक्त 2000 रुपये आकारण्यात येणार आहे, असं राज्य सरकारने जारी केलेल्या परिपत्रकात स्पष्ट करण्यात आलं आहे. त्याचबरोबर कोरोना केंद्रावरुन चाचणीसाठी रुग्णाचे सॅम्पल घेतले तर 1600 रुपये आकारले जाणार आहेत.

हेही वाचा : कल्याणमध्ये वृद्ध महिलेचा अ‍ॅम्ब्युलन्स अभावी मृत्यू, रुग्णवाहिका न मिळाल्याने पोलीस व्हॅनमधून रुग्णालयात