सहकारी बँका, साखर कारखान्यांना सरकारी हॉस्पिटल चालवू द्या, रोहित पवारांचा प्रस्ताव

मुंबई : ‘कोरोना’च्या संकटकाळातून बाहेर येण्यासाठी सर्वच स्तरातील व्यक्ती आपापले योगदान देत आहेत. बॉलिवूडपासून राजकीय नेते आणि उद्योजकांपासून सर्वसामान्य नागरिक पुढे सरसावले आहेत. कोणी आर्थिक हात दिला आहे, यात कोणी अत्यावश्यक सेवा बजावण्याची तयारी दर्शवली आहे. राष्ट्रवादीचे युवा आमदार आणि शरद पवार यांचे नातू रोहित पवार यांनी ग्रामीण भागात आरोग्य सेवा सुधारण्यासाठी अनोखा प्रस्ताव मांडला आहे. (Rohit Pawar on Government Hospitals in Rural Area)

‘कोरोनाच्या पार्श्वभूमीवर सक्षम असलेल्या सहकारी बँका, साखर कारखाने, दूध संघ यांना सरकारी हॉस्पिटल चालवण्याची परवानगी देता येईल का, याबाबत विचार करण्यात यावा. यामुळे ग्रामीण भागातही चांगली आरोग्य सेवा देण्यास मदत होईल.’ अशी कल्पना रोहित पवार यांनी ट्विटरवर मांडली आहे. आरोग्यमंत्री राजेश टोपे आणि सहकार पणन मंत्री बाळासाहेब पाटील यांना यामध्ये मेन्शन केलं आहे.

कोरोनाच्या पार्श्वभूमीवर सक्षम असलेल्या सहकारी बँका, साखर कारखाने, दूध संघ यांना सरकारी हॉस्पिटल चालवण्याची परवानगी देता येईल का, याबाबत विचार करण्यात यावा. यामुळे ग्रामीण भागातही चांगली आरोग्य सेवा देण्यास मदत होईल.@rajeshtope11 @Balasaheb_P_Ncp

— Rohit Pawar (@RRPSpeaks) April 10, 2020

सध्या अतिरिक्त दुधाची भीषण समस्या निर्माण झाली असून त्यामुळे दूध उत्पादक शेतकरी कोलमडला आहे. या पार्श्वभूमीवर अतिरिक्त दुधाची भुकटी तयार करुन ती शाळांमध्ये विद्यार्थ्यांना मोफत/रेशनवर स्वस्त दरात देता येईल का, याबाबत विचार करण्यात व्हावा, अशी विनंतीही त्यांनी केली आहे.

विविध योजनांचे पैसे काढण्यासाठी सध्या बँकांमध्ये मोठी गर्दी होतेय, त्यामुळे सर्वच बँकांनी आपापल्या अगदी गावपातळीपर्यंतच्या शाखांमध्येही सॅनिटायझर ठेवावं व तसा आदेश बँकेच्या जबाबदार अधिकाऱ्यांनी द्यावा. कोरोना प्रतिबंध व लोकांची सुरक्षा यासाठी हे आवश्यक आहे, अशी सूचनाही त्यांनी केली आहे.

पुण्यातील 86 वर्षीय कॅप्टन भरुचा यांनी तयार केलेल्या डिझाईनप्रमाणे विकास चैतन्य, प्रतीक पाटील, शार्दूल, हितेश पाटील व सुनील किर्दक या उद्योजकांनी 8 दिवसांत केवळ 15 हजार रुपयांत व्हेंटिलेटरवर बनवला. ज्येष्ठांचं ज्ञान आणि तरुणांची जिद्द एकत्र आली तर काय होऊ शकतं याचं हे उदाहरण आहे, असं म्हणत रोहित पवारांनी काल एक व्हिडिओ शेअर केला होता. भरुचा यांनी डिझाईन केलेल्या व्हेंटिलेटरचं संगणकीय मॉडेल तयार करुन ते सर्वांसाठी खुलं करण्यात आलं आहे. (Rohit Pawar on Government Hospitals in Rural Area)