चिमणीला पाणी नव्हतं, तिथे धबधबा कोसळू लागला, पानी फाऊंडेशनने करुन दाखवलं!

सांगली : सांगली जिल्ह्यातील तासगाव तालुक्यात गेले दोन दिवस पाऊस सुरु आहे. या पावसामुळे येथील जलसाठे भरत आहेत. ज्याप्रमाणे राज्यभरातील अनेक ठिकाणी पावसाने धबधबे ओसंडून वाहत आहेहेत, अगदी त्याचप्रमाणे, यावर्षी चक्क दुष्काळी सावर्डे गावात धबधबा वाहू लागला आहे. उन्हाळ्यात पानी फाऊंडेशनच्या (Paani Foundation) माध्यमातून, वॉटर कप स्पर्धेसाठी साऱ्या गावानं एकजुटीने डोंगरावर जलसंधारणाची कामे केली. त्यामुळे पावसाळ्यात डोंगर हिरवाईने नटला आणि गावात धबधबे वाहू लागले आहेत.

उन्हाळ्यात वॉटर कप स्पर्धेसाठी साऱ्या गावानं एकजुटीने डोंगरावर जलसंधारणाची कामे केली. ज्या शिकोबाच्या शेकडो हेक्टरच्या डोंगरात बघायला सुध्दा पाणी मिळत नव्हते. त्या डोंगरावरुन धो धो पाणी पडू लागले आहे. या ठिकाणचा हा धबधबा पाहण्यासाठी तासगाव आणि कवठेमहांकाळ तालुक्यातील पर्यटक सावर्डेच्या डोंगरावर येऊ लागले आहेत. गावातील ग्रामस्थांसाठी तसंच पर्यटकांसाठी हा धबधबा म्हणजे एक पर्वणी ठरत आहे.

तासगाव तालुक्याला कायम पाचवीला पुजलेला दुष्काळ आहे. याच दुष्काळाला यावर्षी हरवण्यासाठी पानी फाऊंडेशनच्या मदतीनं साऱ्या गावानं डोंगरावर जलसंधारणाची काम केली. वरुणराजाने त्यांच्या प्रामाणिक कष्टाला धो..धो पडून सलाम केला. आणि 4 दिवसांपूर्वी ज्या शिकोबाच्या शेकडो हेक्टरच्या डोंगरात चिमणीला प्यायला पाणी न्हवतं तिथं पाणीच पाणी जमा झालं. त्या पाण्यात चिमण्या पाखरांनी अंघोळ केली. डोंगरातली जनावरं पाणी प्यायला आली. भर उन्हाने करपलेली धरणीमाता थंड झाली.

सावर्डे गावातील सौंदती देवालयाजवळील डोंगरावर हा धबधबा सुरू झाला आहे. ” लई दिसांनी भरल्यावानी  शिवार झालंया’ याचीच अनुभूती सावर्डेच्या लोकांना पाणी बघून आली.