कोल्हापूर- गोवा मार्गावर भीषण अपघात, वैभववाडी करुळ घाटात ट्रक 200 फूट खोल दरीत कोसळला

सिंधुदुर्ग : कोल्हापूर गोवा मार्गावरिल वैभववाडी करुळ घाटात चालकाचे नियंत्रण सुटल्याने ट्रक दोनशे फूट खोल दरीत कोसळला आहे. कोल्हापूरहून गोव्याकडे जाणार ट्रक वैभववाडी करुळ घाटात दरीत कोसळून अपघात झाला. या अपघातामध्ये जीवितहानी झालेली नाही. जखमी ट्रकचालकाला वैभववाडी पोलिसांनी सह्याद्री जीवरक्षक टीमच्या मदतीने दरीतून बाहेर काढण्यात आले आहे. (Truck collapsed into 200 feet deep gorge in Vaibhavwadi Karul Ghat)

अपघात झालेला ट्रक कोल्हापूरहून गोव्याकडे मैद्याचे पीठ घेऊन निघाला होता.  हा  ट्रक करूळ घाटात अवघड वळणावर आल्यावर चालकाचे नियंत्रण सुटल्यामुळे दोनशे फूट दरीत कोसळला. या ट्रकचे चालक श्रीमंत बिकट (वय 50 करवीर, कोल्हापूर) हे गंभीर जखमी झाले आहेत. अपघातावेळी क्लिनरने ट्रकमधून उडी मारल्यामुळे बचावला आहे.

अपघाताची माहिती मिळताच वैभववाडी पोलिसांनी घटनास्थळी धाव घेतली. पोलिसांनी करूळ येथील सह्याद्री जीवरक्षक टीमच्या मदतीने मदतकार्य सुरु केले. दोनशे फूट दरीत उतरून ड्रायव्हरला बाहेर काढून त्याचे प्राण वाचवण्यात आले.

दरम्यान, बचावकार्य केल्यानंतर जखमी ड्रायव्हरला कोल्हापूर येथील जिल्हा रुग्णालयात दाखल करण्यात आले आहे. अपघातप्रकरणी वैभववाडी पोलीस अधिक तपास करत आहेत.

संबंधित बातम्या:

पीकअपच्या भीषण अपघातात दुचाकीस्वारांनी दिला मृत्यूला चकवा, थरकाप उडवणारं CCTV फूटेज

नंदुरबारमध्ये खाजगी बसचा भीषण अपघात, 35 प्रवासी जखमी, 4 जणांचा मृत्यू

(Truck collapsed into 200 feet deep gorge in Vaibhavwadi Karul Ghat)