शरीरात दिसणारी ही चिन्हे मधुमेहाची सुरुवाती लक्षणे असू शकतात; तुम्ही टेस्ट न करताही ओळखू शकता

आजकाल फार कमी वयात मुला-मुलींना डायबिटीस होताना दिसत आहे. रोजची लाईफस्टाईल पाहता डायबिटीस होणं म्हणजे अगदी सामान्य बाब झाली आहे. त्यात टाइप 2 मधुमेह होण्याचं प्रमाण तर फारच वाढलं आहे. टाइप 2 मधुमेह, आता तरुणांमध्ये वेगाने वाढत आहे. तो सुरुवातीच्या टप्प्यात कोणतीही गंभीर लक्षणे दाखवत नाही, ज्यामुळे तो ओळखणे कठीण होते. मात्र आपले शरीर काही सूक्ष्म संकेत देत असतं आणि जर का ते ओळखता आले आणि आपण सुरुवातीच्या टप्प्यात ही स्थिती समजून घेऊ शकलो तर लगेच उपचार सुरु करणे सोपे जाते.

तर जाणून घेऊयात की नक्की ती कोणती लक्षणे आहेत.

वारंवार लघवी होणे : जर तुम्ही नेहमीपेक्षा जास्त वेळा लघवीला जात असाल, विशेषतः रात्री, तर ते पॉलीयुरियाचे लक्षण असू शकते. किडनी रक्तातील अतिरिक्त साखर काढून टाकण्यासाठी जास्त काम करते. ज्यामुळे वारंवार बाथरूमला जावे लागते. हे मधुमेहाचे सुरुवातीचं लक्षण आहे.

सतत तहान लागणे : तुम्ही कितीही पाणी प्यायल्यात तरी तुम्हाला नेहमीच तहान लागते का? वारंवार लघवी झाल्यामुळे होणाऱ्या डिहायड्रेशनमुळे हे होऊ शकते. शरीर जास्त द्रवपदार्थ बाहेर काढत असल्याने, ते मेंदूला जास्त पाणी पिण्याचा संकेत देते, ज्यामुळे जास्त तहान लागते.

वजन कमी होणे: कोणत्याही प्रयत्नाशिवाय अचानक वजन कमी होणे हे धोक्याचे लक्षण असू शकते. जेव्हा तुमचे शरीर उर्जेसाठी ग्लुकोजचा योग्य वापर करू शकत नाही, तेव्हा ते चरबी आणि स्नायूंचे विघटन करण्यास सुरुवात करते, ज्यामुळे वजन कमी होण्यास सुरुवात होते.

थकवा: सतत थकवा जाणवणे हे मधुमेहाचे एक सामान्य लक्षण आहे. जेव्हा शरीर उर्जेसाठी ग्लुकोज वापरू शकत नाही, तेव्हा थकवा आणि आळस जाणवू शकतो.

हात किंवा पायांमध्ये मुंग्या येणे किंवा सुन्न होणे : हात आणि पायांमध्ये मुंग्या येणे किंवा सुन्न होणे हे मधुमेहाचे लक्षण असते. हा एक प्रकारे नसांचे नुकसानच आहे. जे दीर्घकाळापर्यंत रक्तातील साखरेच्या पातळीत वाढ झाल्यामुळे होते. हे बहुतेकदा पाय आणि हातांमध्ये सुरू होते आणि रक्तातील साखरेची पातळी नियंत्रित न केल्यास कालांतराने ते आणखी बिकट होऊ शकते.

कोरडी त्वचा आणि खाज सुटणे: त्वचेवर खाज सुटणे हे मधुमेहाचे लक्षण असू शकते. रक्तातील साखरेचे प्रमाण वाढल्याने डिहायड्रेशन होऊ शकते, ज्यामुळे त्वचा कोरडी आणि चिडचिडी होऊ शकते. याव्यतिरिक्त, खराब रक्ताभिसरणामुळे त्वचेला आवश्यक पोषक तत्वे मिळत नाहीत, ज्यामुळे कोरडेपणा आणि खाज सुटू शकते.

तर अशा पद्धतीने जर आधीच सुरुवातीची ही काही लक्षणे ओळखता आली तर मधुमेह कंट्रोल करणे शक्य आहे. घरगुती उपायांसोबतच डॉक्टरांचा सल्ला घेणंही तितकेच महत्त्वाचं आहे.