दर तासाला फक्त 5 मिनिटं चाला अन् पाहा आरोग्यास होणारे फायदे, आजच करा सुरुवात

आजच्या धकाधकीच्या जीवनात माणूस पूर्णपणे व्यस्त झाला आहे. एवढंच नाही रोजच्या प्रवासामुळे शरीरात त्राण राहत नाही. आजच्या दिवसांबद्दल सांगायचं झालं तर, अनेक लोक नोकरी किंवा कामांमुळे दिवसभर डेस्कवर, कार्यालयात किंवा घरी तासन्तास बसून राहतात. सतत बसण्यामुळे हृदयरोग, मधुमेह आणि लठ्ठपणा यांसारख्या अनेक गंभीर आरोग्य समस्या निर्माण होत आहेत. केंब्रिज आणि कोलंबिया विद्यापीठांतील संशोधकांनी यावर एक सोपा उपाय सुचवला आहे. तो म्हणजे, दर तासाला किमान 5 मिनिटे चाला. डॉक्टर देखील कायम चालण्याचा सल्ला देतात.

चालल्यामुळे रक्ताभिसरण आणि हृदयाचं आरोग्य सुधारतं. दीर्घकाळ एकाच जागी बसून राहिल्याने पायांमधील रक्तवाहिन्यांमधील रक्ताभिसरण मंदावते. दर तासाला 5 मिनिटं उठून चालल्याने हृदयाकडे होणारा रक्तप्रवाह सुधारण्यास मदत होते. यामुळे रक्तदाब नियंत्रणात राहतो आणि हृदयविकाराच्या झटक्याचा धोका कमी होतो.

रक्तातील साखरेच्या पातळीच नियंत्रण प्रमाणात राहतं. जेवणानंतर किंवा बैठे काम करताना रक्तातील ग्लुकोजची पातळी वाढते. दर तासाला 5 मिनिटं चालल्याने स्नायूंना ग्लुकोज अधिक वेगाने शोषून घेण्यास मदत होते. परिणामी, टाईप 2 मधुमेह असलेल्या व्यक्तींमध्ये आणि सर्वसामान्य लोकांमध्ये इन्सुलिन संवेदनशीलता सुधारते.

पाठदुखी आणि स्नायूंचा ताण कमी करते. एकाच जागी बसल्याने पाठीचा कणा, मान आणि कमरेच्या स्नायूंवर खूप दाब येतो. थोडा वेळ थांबून चालल्याने स्नायू शिथिल होतात आणि शरीर योग्य स्थितीत येते. यामुळे दीर्घकालीन पाठदुखी टाळण्यास मदत होऊ शकते.

मानसिक शांतता आणि एकाग्रता वाढते. सतत स्क्रीनसमोर बसल्याने मेंदू थकतो. दर तासाला 5 मिनिटं चालल्याने मेंदूला होणारा ऑक्सिजनचा पुरवठा वाढतो आणि एंडोर्फिन नावाचं आनंदी हार्मोन्स स्रवतात. यामुळे तणाव कमी होतो आणि तुमच्या कामातील एकाग्रता व उत्साह वाढतो.

निरोगी राहण्यासाठी तुम्हाला व्यायामशाळेत तासन् तास घालवण्याची गरज नाही. तुमच्या दैनंदिन दिनचर्येत दर तासाला 5 मिनिटं चालण्याची सवय लावा. हा छोटासा बदल तुमचे आयुष्यभराचे आरोग्य आणि दीर्घायुष्य वाढवण्यासाठी एक उत्तम साधन ठरू शकतो. पण जीवनशैलीत कोणतेही बदल करण्यापूर्वी डॉक्टरांचा सल्ला नक्की घ्या.