भाऊसाहेब वाकचौरे काठावरच? सकाळपासून नॉट रिचेबल, बैठकीला पुन्हा दांडी? ठाकरे गटात अस्वस्थता

MP Bhausaheb Wakchaure not reachable: आज उद्धव ठाकरे यांनी पक्षाच्या खासदारांची मातोश्रीवर बैठक बोलावली आहे. थोड्याच वेळात बैठकीला सुरुवात होईल. या बैठकीला काही खासदार खासगी कामानिमित्त व्हर्च्युअली उपस्थिती असतील असा दावा थोड्यावेळापूर्वी पत्रकार परिषदेत खासदार संजय राऊत यांनी केला. तर आता नवीन राजकीय घडामोडींमुळे उद्धव सेनेते अस्वस्थता पसरल्याची माहिती सूत्रांनी दिली. शिर्डीचे खासदार भाऊसाहेब वाकचौरे हे सकाळपासून नॉटरिचबेल असल्याचा दावा करण्यात येत आहे. त्यांचा फोन सकाळपासून लागत नसल्याची माहिती समोर येत आहे. त्यामुळे ते मातोश्रीवर होणाऱ्या आजच्या (१४ जून) बैठकीला उपस्थित असतील का? याची उत्सुकता ताणल्या गेली आहे. त्यांचा संपर्क होऊ न शकल्याने त्यांची अधिकृत बाजू अद्याप समोर आलेली नाही.

ऑपरेशन टायगर अंतिम टप्प्यात?

गेल्या दोन दिवसांपासून एकनाथ शिंदे यांचे खासदार, मंत्री आणि आमदार यांनी पुन्हा ऑपरेशन टायगरला हवा दिली आहे. खासदार संजय राऊत यांनी या दाव्यांमध्ये काही तथ्य नसल्याचा दावा करत उद्धव सेना ऑपरेशन लांडगा राबवले असे प्रत्युत्तर दिले आहे. ७ जून रोजी उपमुख्यमंत्री एकनाथ शिंदे हे दिल्लीत डेरेदाखल होते. त्यावेळी उद्धव सेनेचे काही खासदार त्यांच्या संपर्कात होते अशी माहिती सूत्रांनी दिली आहे. तर केंद्रीय राज्यमंत्री प्रतापराव जाधव यांनी ऑपरेशन टायगर लवकरच पुर्णत्वास जाईल असा दावा केला आहे. दुसरीकडे आमदार निलेश राणे यांनी तर आमच्याकडे सातत्याने इनकमिंग सुरू आहे, मातोश्रीवरील आजच्या बैठकीला कोण उपस्थित राहतं ते पाहा असा सूचक इशारा दिला आहे. त्यामुळे या बैठकीवर ऑपरेशन टायगरचे सावट उभं ठाकलं आहे.

अंगणातील सभेला वाकचौरेंची पाठ

जूनच्या सुरुवातीलाच शिर्डी येथे ठाकरे सेनेचा मेळावा झाला. या मेळाव्याला खुद्द ठाकरे सेनेचे खासदार भाऊसाहेब वाकचौरे यांनी दांडी मारली. अंगणातील सभेलाच त्यांनी पाठ दाखवल्याने ऑपरेशन टायगरमध्ये अजून एक शिकार झाल्याची चर्चा शिर्डीत रंगली होती. तर छत्रपती संभाजीनगरचे माजी खासदार आणि शिवसेना नेते चंद्रकांत खैरे यांनी वाकचौरेंच्या अनुपस्थितीवर जोरदार प्रहार केला. त्यांनी याप्रकारावर तीव्र नाराजी जाहीर केली. वाकचौरेंवर उघड नाराजी व्यक्त केली. वाकचौरे यांनी विरोधी गटात जाऊ नये असा सल्ला खैरे यांनी वाकचौरेंना दिला होता. वाकचौरेंसारखे यांच्या या बदलत्या भूमिकेची मतदारसंघातही मोठी चर्चा आहे. अहिल्यानगर जिल्ह्यात भाजपविरोधात शिंदे सेना प्रबळ होऊ पाहत तर मराठवाड्यातही शिंदे सेना मोठी स्पेस शोधत आहे. पश्चिम विदर्भात बच्चू कडू यांना पक्षात घेऊन शिंदे सेनेने मोठी पोकळी भरून काढण्याचा प्रयत्न केला आहे. आता ऑपरेशन टायगरच्या माध्यमातून मुंबईसह मराठवाड्यात भाजपसमोर मोठे आव्हान उभं करण्याची तयारी सुरू असल्याची गोटातील माहिती सूत्रांनी दिली आहे.