उद्धव सायेबांचं मन लई मोठं हाय… लेकाला उमेदवारी मिळताच मायच्या डोळ्यात अश्रू, अंबादास दानवेंच्या घरातील भावूक क्षण

राज्यातील विधान परिषद निवडणुकीनिमित्त राजकीय वातावरण तापू लागल आहे. आज उद्धव ठाकरे यांनी अंबादास दानवे यांना उमेदवारी जाहीर केली आहे. काही दिवसांपासून उद्धव ठाकरे हे उमेदवार असण्याची शक्यता वर्तवली जात होती, मात्र उद्धव ठाकरेंनी अंबादास दानवे यांचा विधानपरिषदेत पाठवण्याचा निर्णय घेतला आहे. दानवे हे आधीही विधान परिषदेत होते, त्यांनी विरोधीपक्षनेतेपद भूषविले आहे. त्यामुळे त्यांच्यावर विश्वास दाखवण्यात आला आहे. अशातच आता अंबादास दानवे यांच्या आई आणि पत्नीने आनंद व्यक्त करण्यात आला आहे. याबाबत सविस्तर माहिती जाणून घेऊयात.

उद्धव साहेबांनी वचन पूर्ण केलं…

अंबादास दानवे यांना उमेदवारी जाहीर झाल्यानंतर त्यांच्या मातोश्री सगुनाबाई दानवे यांच्या डोळ्यात आनंदाश्रू पहायला मिळाले. यावेळी बोलताना सगुनाबाई दानवे यांनी म्हटले की, ‘उद्धव साहेब उभे राहणार होते, मात्र त्यांनी उमेदवारी माझ्या मुलाला दिली हेच खूप मोठे झालं. उद्धव साहेब माझ्या घरी आले होते तेव्हा त्यांनी आश्वासन दिले होतं माझ्या मुलाला कुठे कमी पडू देणार नाही ते त्यांनी वचन पूर्ण केलं.’

मला माझ्या मुलाचा अभिमान आहे

पुढे त्यांना डोळ्यातील आनंदाश्रूंबद्दल विचारण्यात आले, यावर बोलताना सगुनाबाई यांनी म्हटले की, आनंदाश्रू म्हणजे आम्ही खूप कष्ट केले, अंबादास कधी एक दिवस घरी राहत नाही या गावावरून त्या गावाला फिरत राहतो. घरातलं कधीच बघत नाही पूर्ण जनतेचेच बघतो. माझं बोलणं झालं आहे, साहेबाची उमेदवारी मला दिले म्हणून सांगितल आहे. लहान भावासारखं सांभाळून घेतलं हेच मोठे कर्तव्य केलं त्यांनी. मला खूप अभिमान आहे मला माझ्या मुलाचा. उद्धव ठाकरे साहेबांचे खूप खूप उपकार आहेत माझ्यावर आता. बालपणी खूप परिस्थिती बेकार होते ते काही सांगायचं काम नाही, आता माझे चारही मुलं कमवते झाले. मी मेस चालवली, बिड्या बांधून मुलांचे शिक्षण केल आहे. मी जे कष्ट केले ते माझ्या मुलांच्या कामाला आले, उद्धव ठाकरे साहेबांना माझे कोटी कोटी नमस्कार.

पत्नीनेही मानले उद्धव ठाकरेंचे आभार

अंबादास दानवे यांच्या पत्नी अनुराधा दानवे यांनी म्हटले की, हिंदुह्रदय सम्राट बाळासाहेब ठाकरे यांच्या विचारधारेने ते तयार झाले आहेत. आताही या जागेसाठी उद्धव साहेबांचे नाव पुढे येत होतं, तरीसुद्धा उद्धव साहेबांनी त्यांची जागा दिली उद्धव ठाकरेंचं मन खूप मोठं आहे त्यांचे खूप खूप धन्यवाद मी मानेल. ते घरी थांबत नाहीत, वेळ देत नाहीत पण आम्ही सगळे सांभाळून घेतो. पंचवीस वर्षापासून त्यांचे कार्य चालू आहे, पद असो किंवा नसो त्यांचे कार्य चालू असतं. त्यांना उमेदवारी मिळाली तेव्हा खूप आनंद झाला, उद्धव साहेबांचे खरंच खूप धन्यवाद मानते. साधी गोष्ट नाही, उद्धव ठाकरेंचं मन खूप मोठं आहे, त्यांनी ही जागा दिली, त्यासाठी खूप मन मोठं असावं लागतं.