राज्याच्या राजकीय वर्तुळातील धमकी सत्र सुरुच; आमदार रवी राणा यांना जीवे मारण्याची धमकी

अमरावती : कालपासून राज्याच्या राजकारणात धमक्यांच्या फोनचं सत्र सुरू आहे. काल सकाळी राष्ट्रवादीचे ज्येष्ठ नेते आणि शिंदे सरकारमधील मंत्री छगन भुजबळ यांना जीवे मारण्याची धमकी आल्याचं समोर आलं. त्यानंतर दुपारी राष्ट्रवादीचे वरिष्ठ नेते, मंत्री धनंजय मुंडे यांना धमकीचा फोन आला आणि आज आणखी एका आमदाराला धमकीचा फोन आलेला आहे. त्यामुळे राज्याच्या राजकीय वर्तुळात एकच खळबळ उडाली आहे.

आमदार रवी राणा यांना जीवे मारण्याची धमकी देण्यात आली आहे. फोनवरून त्यांना ही धमकी देण्यात आली आहे.

तू महाराष्ट्रभर फिरणं बंद कर. नाहीतर तुझ्या जीवाचं काही तरी करून टाकू. अचानक काही घडलं किंवा अपघात झाला तर मग म्हणू नको, असा इशारा धमकी देणाऱ्या व्यक्तीने रवी राणा यांना दिला आहे.

तू एवढ्या वेळेस आमच्या विरोधात कसा काय बोलतो. आता हे सगळं थांबव नाही तर तुला संपून टाकतो, अशी धमकी देण्यात आली आहे.

आमदार रवी राणा यांना आलेल्या धमकी प्रकरणी त्यांनी पोलिसात तक्रार दाखल केली आहे. या प्रकरणी गुन्हा दाखल करण्यात आली आहे. अमरावतीच्या राजापेठ पोलीस ठाण्यात अदखलपात्र गुन्हा दाखल करण्यात आला आहे. 507 नुसार छत्रपती संभाजीनगरमधल्या व्यक्तीवर गुन्हा दाखल करण्यात आला आहे. रवी राणा धमकी प्रकरणाचा राजापेठ पोलीस तपास करीत आहेत.

मंत्री छगन भुजबळ यांना जीवे मारण्याची धमकी

मंत्री छगन भुजबळ यांच्या कार्यालयातील एका कार्यकर्त्याच्या फोनवर धमकीचा फोन आला होता. या फोनवर भुजबळ यांना आपण जीवे मारणार आहोत. तशी सुपारी आपल्याला मिळाली आहे, असं तो तरूण सांगत होता.

भुजबळांना जीवे मारण्याची धमकी देण्यात आल्यानंतर पोलिसांकडून तपास केला जात आहे. या तपासात पुण्यातील एका तरूणाला पुणे पोलिसांकडून अटकही करण्यात आली आहे. तसंच भुजबळांच्या सुरक्षेतही वाढ करण्यात आली आहे.

धनंजय मुंडे यांना धमकीचा फोन

मंत्री धनंजय मुंडे यांनाही धमकीचा फोन आला आहे. धनंजय मुंडे यांच्या परळीच्या घरी धमकीचा फोन आल्याची माहिती आहे. या फोनवरून मुंडे यांना धमकी देण्याबरोबरच पैशांचीही मागणी करण्यात आली आहे. 50 लाख रूपये द्या अन्यथा…, असं म्हणत धनंजय मुंडे यांना फोन आला आहे.